Antón García Fernández (Tuña, 1960)

Director xeneral d'Acción Cultural y Normalización Llingüística, ye llicenciáu en Filoloxía Española pola Universidá d’Uviéu y foi profesor asociáu de Lliteratura Asturiana y de Lliteratura Española na mesma universidá. Empresariu cultural ente 1992 y 2019, foi fundador y xerente de distintes empreses dedicaes al sector del llibru y de la producción audiovisual. Arreyáu dende bien nuevu al movimientu de recuperación de la llingua asturiana, tien editaos cinco llibros de poesía, trés noveles, dos llibros de relatos y un llibru infantil, toos nesta llingua. Tamién ye traductor y críticu lliterariu, amás d’historiador de la lliteratura asturiana, tema sobre’l que tien publicaos distintos estudios y ensayos. Foi miembru del grupu d’investigación «Seminariu de Filoloxía Asturiana» de la Universidá d’Uviéu. Ente’l 2011 y el 2019 editó y dirixó la revista asturiana de cultura Campo de los Patos.

Ente 1988 y 1991 coordinó la Política Llingüística del Gobiernu del Principáu d’Asturies baxo la presidencia de Pedro de Silva. Foi miembru del Conseyu Social de la Universidá d’Uviéu de 1997 a 1999 y vocal de la Comisión Económica de dichu Conseyu.