El presidente del Principáu, Adrián Barbón, presentó'l vienres 20 de febreru la Estratexa de normalización del asturianu y del eonaviegu 2026-2030, una iniciativa de la Conseyería de Cultura, Política Llingüística y Deporte que remata un análisis bien ampliu de la situación sociollingüística y cultural de les llingües propies. El documentu establez los criterios y oxetivos que van guiar l’acción institucional nos años vinientes, cola mira de promover el so usu social, favorecer la convivencia llingüística y garantizar los derechos llingüísticos y culturales de la ciudadanía.

La estratexa organízase en cinco grandes árees qu’abarquen tolos ámbitos relevantes pa la revitalización del asturianu y del eonaviegu.

• Campu institucional y alministrativu. Nesti ámbitu prevénse midíes pa impulsar la so presencia na Alministración, respetando’l marcu xurídicu vixente y garantizando’l derechu de la ciudadanía a usales nes sos rellaciones colos servicios públicos.
• Tresmisión interxeneracional, enseñanza y mocedá. Incluye programes pa la población mozo que fomenten l’usu cotidianu de les llingües propies como un activu cultural y social.
• Área de cultura, deporte y ociu. Reforcia la so presencia na creación lliteraria, la llectura, la producción audiovisual, el patrimoniu cultural, l’actividá deportiva y la ufierta turística, sectores clave pa la so visibilidá social.
• Economía, medios de comunicación y sociedá. Recueye midíes pa estimular el so usu n’empreses, comercios y entornos dixitales, amás de p’aumentar la so presencia nos medios públicos y privaos, como tamién nel texíu asociativo, la inmigración y l’ámbitu relixiosu.
• Proyección nel esterior. Incorpora iniciatives dirxíes a la diáspora asturiana y a la presencia de las llingües propies nos espacios estatal y internacional.

La estratexa va tar coordinada pola Conseyería de Cultura, Política Llingüística y Deporte, que va exercer la dirección técnica de les llinies d’actuación. Pa ello, va crease una comisión intersectorial de política llingüística, presidida pola titular del área, Vanessa Gutiérrez, y con representación de les árees d’Educación, Universidá, Cultura, Deporte, Ciencia, Salú, Servicios Sociales, Consumu, Turismu, Xusticia, Interior, Igualdá, Mediu Natural, Facienda y Alministración Local, ente más otres.

A lo llargo del actu, la conseyera asitió esti documentu dientro del ciclu d’avances impulsaos baxo la presidencia d’Adrián Barbón. Nestos años llográronse fitos estructurales como la creación de la Subdirección Xeneral de Política Llingüística, un órganu técnicu y xurídicu especializáu; los avances en materia educativa, l’afianciamientu del usu del asturianu na comunicación institucional del Gobiernu y l’aprobación de les instrucciones sobre los criterios lingüísticos que regulen la so presencia na Alministración autonómica.

Al mesmu tiempu, púnxose en valor la votación histórica na Xunta Xeneral que dexó algamar, pela primer vez, una mayoría a favor de la reforma estatutaria pa reconocer la oficialidá de les llingües propies, amás de la meyora que supón la incorporación del asturianu nes convocatories del Ministeriu de Cultura.

Estos progresos lleven a la futura Llei de Cultura y Identidá, anguaño n'ellaboración, que va establecer un marcu común pal sistema cultural asturianu, la protección del patrimoniu y de les llingües de la comunidá. Con esta estratexa, el Principáu afianza un proyectu de convivencia llingüística modernu, garantista y dirixíu a fortalecer la presencia del asturianu y del eonaviegu en tolos ámbitos de la vida.

Descarga'l documentu trillingüe nesti enllaz.