ELEKTRA FIKTION
Arde la viesca 

Vienres 16 d'ochobre. 18:30 h. 

Trayectoria

ElektraFiktion ye una compañía formada por profesionales con una esperiencia bien amplia en dellos campos de les artes escéniques, dende la interpretación al movimientu, amás de l’animación, la docencia, la esperimentación, la creación multimedia o’l diseñu.

El so oxetivu ye desenvolver un universu personal a partir de la innovación, la busca y la investigación, amás d’esplorar llinguaxes nuevos, ensin escaecer el compromisu social. Asina, los sos espectáculos faen por empobinase a tou tipu de públicu, nun procesu d’evolución constante.

Col so anterior espectáculu infantil, Formigues, yá foron finalistes del Premiu Nel Amaro nel 2024 y algamaron el premiu Premiu Oh! al Meyor Vestuariu y Carauterización d’Azucena Rico

Sinopsis

Nuna viesca milenaria del norte, ente carbayos, castaños y fayes habiten n’harmonía un númberu incuntable d’animales: el noble corzu de tiesta coronada, l’esguil llaboriosu, l’osu pardu fanfarrón, el xabaril testerón, l’esnidiosu gallu montés, el corcuspín, l’astuta raposa. Nel regueru les llóndrigues incansables somórguiense una y otra vegada nel agua cristalino onde canten les xaronques y sobre la copa de los árboles so maxestá l’águila real estiende les sos ales protectores, mentanto nel furacu d’un tueru secu la curuxa sabia espera a la lluna y na escuridá afayadiza de la so madriguera mama topu cuida de les sos críes.

Dicen que foi ella, la ciega mama topu, la que primero golió la so presencia y dempués los páxaros dieron l’alarma y l’esguil, mangáu no cimero d’un árbol, pudo ver el fumu y les primeres llaparaes. Y la noticia espardióse como escalafríu per tola viesca; los animales amedrantaos entamaron a fuxir, dexando atrás les sos madrigueres, los sos niales, los sos refuxos, la cebera que guardaben pal iviernu, encarando un futuru inciertu. Van ser los nenos los encargaos de guialos a un llugar seguru protexíos del fueu y van tener que concienciar a toos de que traxedies como esta nun puen volver a asoceder.

Ficha técnica y artística

Autoría y dirección: Rosa Ana Muñoz

Sobre l’escenariu: Rosa Ana Muñoz, Sheila Montes, Lucía Colunga

Escenografía y atrezu: Nuria Trabanco

Vestuariu:Azucena Rico

Diseñu d’illuminación y técnicu: Alberto Ortiz

Fotografía Artística : Noé Baranda

Audiovisuales: Noé Baranda/Carlos A. Cancio

Baille y coreografía: Lucía Colunga, Alma Funky

Traducción al asturianu: Marián Rodríguez

Distribución y producción: ElektraFiktion