Dende güei ta abierta la presentación de candidatures a la edición númberu dieciséis del Premiu Camaretá al Meyor Cantar en llingua asturiana o gallego-asturianu. L'estractu de la convocatoria publicóse ayeri nel BOPA.

La convocatoria ta abierta hasta'l día 2 de mayu a músicos y músiques solistes o grupos musicales que tengan un cantar publicáu o difundíu a lo llargo del añu 2023 y hasta la fecha de la convocatoria vixente.

Depués de zarrase'l plazu de presentación, el xuráu, nuna primer fase, va escoyer d'ente les propuestes presentaes aquelles que considere más meritories pa participar na Gala final, onde los participantes van tener que defender en directo los sos temes. 

El Premiu Camaretá al Meyor Cantar tien una dotación económica de 6.000 euros y inclúi amás la producción d'un videoclip y la participación nel circuitu Autores nel Camín, qu'entama actuaciones a lo llargo del territoriu asturianu en collaboración colos conceyos. 

Enllaz a la ficha de serviciu del Premiu Camaretá al Meyor Cantar.