Ye sabío que la lliteratura y l’actividá escénica y musical en llingua asturiana y gallego-asturianu tán alcanzando unos niveles de calidá y prestixu notables, sofitaos pola esistencia de distintos premios y gallardones, pero munches veces eses creaciones nun acaben d’atopar el calce pa llegar al públicu na manera que merecieren. 
Autores nel Camín ye un programa que naz en 2021 cola mira d'acortar esa distancia ente la ciudadanía y los autores ganadores de los premios lliterarios y artísticos entamaos pola Conseyería de Cultura, Política Llingüística y Turismu. Esti circuitu fai posible llevar per tol territoriu asturianu actividaes culturales nes llingües propies ensin costu pa los conceyos que deciden llevalos a cabu. 
 

PARTICIPANTES 
Dende la puesta en marcha del circuitu n’abril del 2021 participaron 16 autores ente escritores, músicos y compañíes teatrales


Lliteratura 
Nel circuitu de 2021 participen un total de 12 autores d’obres lliteraries, ente los que tan los y les ganadores de los premios lliterarios n’asturianu y  autores de obres en gallego-asturianu o eonaviegu de publicación reciente. 
•    Francisco Álvarez, ganador del XL Premiu «Xosefa Xovellanos» de Novela con Los xardinos de la lluna. 
•    Sidoro Villa, ganador del XLI Premiu «Xosefa Xovellanos» de Novela con El fervinchu
•    José Ángel Gayol, ganador del XXV Premiu «Máximo Fuertes Acevedo» d’Ensayu con El silenciu invisible. 
•    Xune Elipe, ganador del XVI Premiu «Máximo Fuertes Acevedo» d’Ensayu con Hai una llinia trazada. 
•    Gonzalo G. Barreñada, ganador del XV Premiu «Xuan María Acebal» de Poesía con El llar n’orde. 
•    Alejandro Fernández-Osorio, ganador del XVI Premiu «Xuan María Acebal» de Poesía con Tayu.
•    Ruma Barbero, ganador del XI Premiu «Alfonso Iglesias» de Cómic con Seltegu
•    Alberto Vázquez, ganador del XII Premiu «Alfonso Iglesias» de Cómic con El sol na escombrera. 
•    Inaciu Galán y Vero Suari, ganadores de la XIII edición del Premiu «María Josefa Canellada» de Lliteratura Infantil y Xuvenil con La curuxa Catuxa
•    María José Fraga, poeta y autora del poemariu Equipaxe de mao
•    Emma Méndez, narradora y autora de la novela xuvenil Os secretos del molín veyo.

Música 
Nel circuitu musical participen los ganadores del Premiu «Camaretá al Meyor Cantar» de los dos últimos años. 
•    Lafu y Rebeca, dúu ganador de la XI edición con «Sombres sobre la yerba».
•    Rodrigo Cuevas, ganador de la XII edición con «Rambalín».

Teatru
El circuitu teatral inclúi la representación de les obres ganadores del Premiu «Nel Amaro» de Teatru Profesional en 2019 y 2020. 
•    Les rellaciones peligroses, de la compañía Factoría Norte.
•    El viaxe de Covaletti, de la compañía Higiénico Papel. 

 

ACTIVIDAES
Pa 2021 programáronse un total de sesenta y ún actos, de los que los más d’ellos, cuarenta y cinco, corresponden a actos lliterarios de distintu calter: presentación de llibros, alcuentros con llectores, recitales de poesía, charres, talleres de cómic, etc. 
Pel so llau, los actos musicales y teatrales sumen dieciséis eventos. 
Les actividaes programáronse nes dependencies municipales de tipoloxía diversa: teatros, museos, biblioteques, cases de cultura, salones d’actos; pero tamién en centros escolares, y hasta hubo dalguna iniciativa pa llevalos a otros espacios como cafeteríes o sitios al aire llibre. 

 

ALCANCE TERRITORIAL
Les actividaes del circuitu llegaron a 22 conceyos asturianos de tola xeografía asturiana. 
La organización de los actos llevóse a cabu en collaboración colos Servicios Municipales de Normalización Llingüística, presentes nos conceyos d’Avilés, Candamu, Cangas del Narcea, Castrillón, Corvera, Grau, Llangréu, Ḷḷena y Xixón; y les mancomunidaes del Cabu Peñes (Gozón y Carreño), de la Sidra (Nava, Bimenes, Villaviciosa, Colunga, Sariegu y Cabranes), Parque Históricu del Navia (Navia, El Franco, Tapia, Cuaña, Bual, Pezos, Eilao y Grandas de Salime) y Ozcos-Eo (Castropol, A Veiga, San Tiso d’Abres, Santalla d’Ozcos, Samartín d’Ozcos, Vilanova d’Ozcos y Taramundi).

 

PERSPECTIVES DE FUTURU
El programa va siguir en 2022, incorporando a los ganadores de los premios convocaos pola Conseyería de Cultura, Política Llingüística y Turismu en 2021, incluyendo los dos premios de creación recién que se convoquen pela primer vez esti añu: el «Florina Alías» a la Meyor traducción al asturianu, y el «Enriqueta González Rubín» de Narrativa moza en llingua asturiana.
Incorpórense amás los ganadores de los premios «Quiastolita» de Lliteratura Infantil y Xuvenil y «Ría del Eo» de Poesía, creaos esti mesmu añu pa estimular la creación lliteraria en gallego-asturianu.
Los autores nuevos que s’incorporen son: 
Circuitu n’asturianu: 
•    Poesía: Pablo Texón, como ganador del XVII Premiu «Xuan María Acebal» con Cantar de ti mesma. 
•    Novela: José Ángel Gayol como ganador del XLII Premiu «Xosefa Xovellanos» con La cafiante muerte de Nicolai Bostov. 
•    Ensayu: Ramón d’Andrés, como ganador del XVII Premiu «Máximo Fuertes Acevedo» con Una ciencia ensin enfotu. 
•    Infantil y Xuvenil: Xilberto Llano, como ganador del del Premiu «María Josefa Canellada» con Boliescritu de Primavera. 
•    Teatru: La reina de la guapura de Leenane, de la compañía Nun Tris, como obra ganadora del V Premiu «Nel Amaro» de Teatru Profesional. 
•    Traducción: Pendiente del fallu del xuráu. 
•    Narrativa moza: Pendiente del fallu del xuráu. 
•    Música: Pendiente del fallu del xuráu na Gala final del XIII Premiu «Camaretá al Meyor Cantar» (27 de payares de 2021) 
Circuitu en gallego-asturianu: 
•    Poesía: Miguel Rodríguez Monteavaro como ganador del I Premio «Ría del Eo» con Oi, que dice mama que volvas. 
•    Lliteratura Infantil y Xuvenil: Alberto Castro Gión como ganador del I Premio «Quiastolita» con Bandera moura.