HIGIÉNICO PAPEL TEATRO
Gasolina con capullos

Vienres 11 d'ochobre. 20:00 h. 

Trayectoria
Ventiocho años d'esperiencia ininterrumpida y más de cuarenta y cinco espectáculos producíos y estrenaos, siempre con gran ésitu de públicu y crítica, avalen la trayectoria d'esta compañía, con un ampliu repertoriu que destaca pola diversidá temática y espresiva de les propuestes, siempre marcaes por un elegante sellu personal que conxuga toques d'humor, provocación y poesía.
Los sos espectáculos tán respaldaos por numberosos gallardones, ente ellos, el Premiu Nel Amaro de teatru profesional en llingua asturiana con Hansel y Gretel (2018) y El viaxe de Covaletti (2020).

Sinopsis

Nun chigre ensin nome, de madrugada, atópense dos personaxes ensin muncho que perder: Ana, una muyer sola, qu'afuega la pena n'alcohol y que nun dexa de buscar problemes por dicir les verdaes ensin filtros, y Mohamed un mozu inmigrante africanu qu'intenta, ensin ésitu, sobrevivir vendiendo flores pelos chigres de la ciudá. Ente estos dos personaxes, empobinaos
al fracasu y prácticamente escluyíos de la sociedá, va surdir un vínculu de complicidá que va xunilos a lo llargo d'una nueche aciaga. 

Gasolina con capullos ye una traxedia urbana contemporánea tiñida d'humor agriduz que trata dellos temes d'ámbitu social, como la inmigración, la esclusión y les desigualdaes, pero tamién la soledá y la falta d’esperanza ante les poques mires de futuru de les persones desfavorecies y discriminaes por xéneru, raza o cualesquier condición

Ficha técnica y artística

Autoría: Roberto Corte y Chechu García
Dirección: Laura Iglesia
Repartu: Carla Loga,  Sidahmed Matala, Carlos Dávila y Félix Corcuera.
Diseñu d’illuminación: Carlos Dávila
Escenografía: Nuria Trabanco
Vestuariu: Azucena Rico