COVENANT PRODUCCIONES 
Tía Miseria

Vienres 10 d'ochobre. 20:00 h

Espectáculu pa mayores de 13 años

Trayectoria

Covenant Producciones naz cola mira d’entamar y producir espectáculos sobre tradición oral, identidá cultural, memoria y tradición. La so producción más conocida y exitosa ye Animalada xabaz, serie infantil de TPA qu’axunta marionetes, cuentos tradicionales, teatru y música rock.

Nel 2023 empezaron a desenvolver ¡Rodando! Esnidien les histories: un proyectu multiplataforma sobre la cultura nel mediu rural asturianu, cola obra Tía Miseria como exa central. El procesu de creación de la obra y delles actuaciones que s’echaron en llugares asturianos de poca población recuéyense nuna plataforma web y un webdoc.

Sinopsis

Atención, públicu de la comunidá, que lleguen los cómicos y carguen en llombu una montonera d’histories, dicires, músiques... que sacaron del pueblu pa devolvé-ylo fecho teatru. A cuentu de la Tía Miseria vamos viaxar circularmente ente’l pasáu y el porvenir, ente la infancia, la vieyera, la muerte y el poder. Un mecigayu bien prestosu. Tai sollertes, que vais ver cómo la Tía Miseria foi quien a provocar la mayor crisis de tola historia de la Humanidá.

Tía Miseria naz de la tradición oral: una serie d’escenificaciones de delles histories nacíes d’esta fonte de sabiduría popular, que, partiendo d’un cuentu d’oríxenes milenarios, ta adaptáu y reformuláu pol actor, escritor, guionista y monologuista asturianu Carlos Alba Cellero con música, canciones, danza, adivinances, sabiduría popular, conteníu social, instrumentos tradicionales y humor.

Ficha técnica y artística

Autoría: Carlos Alba Cellero

Dirección: Miguel Cubero

Repartu: Carmen Gloria, Carla Loga, Enrique Dueñas

Música en directo: Rafael M. Guerra

Diseñu d’illuminación: Fran Rubio

Escenografía: Nuria Trabanco

Vestuariu: Azucena Rico