El Decretu 86/2019, de 30 d’agostu, establez la estructura orgánica básica de la Conseyería de Cultura, Política Llingüística y Turismu.

DIRECCIÓN XENERAL DE POLÍTICA LLINGÜÍSTICA

Artículu 12.—Funciones y estructura.

1. A la Dirección xeneral de Política Llingüística correspuénde-y l’exerciciu de les siguientes competencies:

a) La planificación, desenvolvimientu y siguimientu de la política llingüística del Gobiernu asturianu no referente al asturianu y al gallego-asturianu.

b) La defensa, promoción y enseñanza de la llingua asturiana como patrimoniu colectivu d’Asturies.

c) La planificación, la execución, la coordinación colos demás departamentos de l’alministración asturiana y con otres alministraciones, el control y la evaluación de los programes necesarios pal desenvolvimientu d’una política llingüística que garantice y normalice socialmente l’usu de la llingua asturiana.

d) La promoción y potenciación de la reconocencia nacional y internacional de la lliteratura escrita en llingua asturiana, y tamién la cultura que s’espresa nesa llingua.

2. Dependen de la Dirección Xeneral de Política Llingüística les siguientes unidaes alministratives:

a) Serviciu de Normalización del Usu de la Llingua Asturiana y Investigación.

A esti Serviciu correspuénden-y, ente otres funciones, les de planificación y execución de programes de normalización del usu de la llingua asturiana y de propuestes qu’impulsen el so estudiu y la so investigación.

b) Serviciu de Planificación y Conocimientu de la Llingua Asturiana.

A esti Serviciu correspuénden-y, ente otres funciones, la planificación y execución de programes d’espardimientu y conocencia de la llingua asturiana.