En xunu de 1974 la revista Asturias Semanal publicaba una entrevista a trés mozos universitarios, Xuan Xosé Sánchez Vicente, Xosé Lluís García Arias y Lluís Xabel Álvarez, que facíen una llamada d'atención a la sociedá asturiana contra'l complexu d'inferioridá rexonal y pidíen la defensa de la llingua asturiana como un bien cultural, la so presencia nos medios de comunicación y na escuela, y la creación d'una lliteratura y d'un públicu pa ella.

En payares de 1974 la mesma revista entamaba una sección baxo’l nome «Conceyu Bable», de la que se responsabilizaba'l Grupu CB, primero quincenal y ensiguida selmanal, que se mantuvo hasta'l final de la revista, en xunu de 1977. Neses páxines ta l'empiezu d'un llabor de dinamización social que foi más allá de la reivindicación llingüística, sirviendo como puntu d'inflexón al empiezu de la Transición: l'autonomía y los símbolos que la identifiquen, como la bandera o l'himnu, les distintes facetes de la música asturiana (la gaita, l'asturianada, el cantar d'autor…), el deporte tradicional, el quesu o la sidra… tuvieron na xente de Conceyu Bable los sos grandes impulsores; pero la so principal contribución foi llograr que se diera un pasu novedosu alredor de la llingua asturiana: de ser un atributu identitariu o un elementu patrimonial a conformar un valor absolutu capaz a xenerar una identidá social nueva. La campaña «Bable nes escueles», que promovió, llevó esi lema hasta los últimos rincones d'Asturies.

Al dedicar la Selmana de les Lletres de 2024 a Conceyu Bable, el propósitu ye facer historia y reivindicar un legáu que tovía se percibe cercanu, a pesar de los cincuenta años trescurríos dende la primer apaición pública d'esta organización. El protagonismu d’esa Selmana va ser entós colectivu, como lo foi'l movimientu que dio orixe a l’asociación del mesmu nome.

El coordinador de la Selmana va ser l'escritor Francisco Álvarez.