El Gobiernu d'Asturies súmase anguaño, pela primer vez, a la celebración internacional del Día de la Narración Oral con una sesión colectiva d'histories narraes nel Muséu Arqueolóxicu. Nel actu, el miércoles 20 de marzu a les 18.30 hores, van participar tanto narradores profesionales como persones que popularizaron y caltuvieron esta tradición viva nel Principáu nes últimes décades. 

La Conseyería de Cultura, Política Llingüística y Deporte entama la xornada en collaboración cola Asociación de Profesionales de la Narración Oral n'España (Aeda). Nel actu van intervenir los narradores asturianos David Acera, Carlos Alba y Ana Morán, amás del gallegu Caxoto. Amás, va convidase a narradores tradicionales non profesionalizaos pa convertir la xornada nuna fiesta del cuentu.

La conseyería súmase asina a una iniciativa que nació na última década del sieglu XX en Suecia. L'asociación de narradores del país propunxo celebrar l'equinocciu de primavera cuntando histories. D'entós p'acá foron sumándose otres naciones y llingües nueves a esta conmemoración, que busca que'l patrimoniu oral se caltenga y divulgue.

Amás, el Principáu punxo en marcha anguaño, pela primer vez, un circuitu propiu pa la narración oral dientro de les actividaes d'Asturies, Cultura en Rede, el programa de divulgación cultural qu'impulsa en collaboración colos conceyos y les empreses de tolos sectores de la industria cultural. Nel primer semestre del 2024, dientro del circuitu de narración oral, tán programaes 53 actividaes pa tou tipu de públicu de 27 profesionales en 39 conceyos.