La conseyera d'Educación, Lydia Espina, anunció ayeri delles midíes pa favorecer l'enseñu del asturianu y eonaviegu tanto nel ámbitu de la educación d'adultos como nel de la educación primaria y secundaria. 

En primer llugar, la conseyera anunció que se va introducir l'enseñu de les llingües propies d'Asturies na Escuela Oficial d'Idiomes dende'l cursu 2025-2026, anque nun siendo llingua oficial, el títulu obteníu va ser un títulu propiu. La diferencia col sistema actual de pruebes llibres de certificación ye que, amás de sacar el títulu, va poder recibise una enseñanza reglada empobinada a ello. 

En segundu llugar, Espina tamién avanzó la intención de recuperar l'Axenda Didáctica, programa escolar col que los centros podíen solicitar actividaes complementaries (teatru, música, visites guiaes, etc.) en llingua asturiana o eonaviegu, anque precisó que podía haber cambeos na organización y los conteníos con respectu al programa orixinal. 

Amás, tamién s'anunciaron novedaes encaminaes a reconocer la escelencia nel desempeñu de la enseñanza y l'aprendimientu de les llingües, que se van llevar a cabu a partir del cursu 2024-2025. Per un llau, va crease un sellu d'escelencia pa reconocer aquellos centros que trabayen proyectos d'innovación educativa en llingua asturiana. Pel otru, tamién se crea la categoría d'asturianu y eonaviegu nos premios estraordinarios que s'otorguen a los estudiantes de Secundaria, Bachilleratu y FP.  Esta categoría nueva va estrenase na ceremonia d'entrega del añu 2025, onde se va distinguir al alumnáu que destaque nel cursu actual.