El Principáu yá cunta col primer Manual de llinguaxe alministrativu en llingua asturiana pa facilitar l'usu del asturianu na Alministración pública. Los llabores técnicos y de redacción remataron el mes de xunu pasáu, gracies al esfuerciu conxuntu d'un grupu de trabayu impulsáu dende la Viceconseyería de Cultura, Política Llingüística y Deporte y cola participación del Institutu Asturianu d'Alministración Pública (IAAP) del Principáu d'Asturies, la Universidá d'Uviéu, l'Academia de la Llingua Asturiana y la Rede de Normalización Llingüística.

L'usu escritu de la llingua asturiana na xestión alministrativa naz vinculáu al desenvolvimientu de la estructura autonómica dende los años ochenta del sieglu XX. Foi'l personal trabayador de los departamentos socesivos encargaos de la promoción del asturianu na Alministración autonómica, y de los servicios de normalización llingüística na local, quien dio los primeros pasos pa dir fixando un llinguaxe alministrativu asturianu claru, precisu y común, col que se pueda identificar cualquier falante.

La ellaboración d'esti testu de referencia parte d'esos trabayos anteriores, pero ye la primer iniciativa puesta en marcha nel Principáu pa dotar d'una ferramienta de normalización léxica y llingüística a les Administraciones autonómica y local, a disposición de les persones que nelles trabayen.

El grupu de trabayu afitó les tipoloxíes documentales que más usa l'Alministración pa depués ellaborar modelos n'asturianu d'esos documentos. El manual incorpora tanto documentos de l'Alministración autonómica (formularios, requerimientos, resoluciones, declaraciones responsables, anuncies, bases reguladores...), como de la local (certificaciones, solicitúes, fueyes de reclamación, llicencies, actes de matrimoniu...). El manual, que tien un formatu billingüe n'asturianu y castellanu, complétase con dellos anexos: abreviatures, llista de normativa y un glosariu de terminoloxía alministrativa.

Nesti enllaz pue descargase'l Manual de llinguaxe alministrativu en llingua asturiana, tamién accesible nel catálogu bibliográficu d’esta web.