Héctor Braga ganó la ventesima novena edición del Premiu «Máximo Fuertes Acevedo» d'Ensayu en llingua asturiana, que concede la Viceconseyería de Cultura, Política Llingüística y Deporte, cola obra titulada Nel cantu la memoria. Ensayu sobro l'asturianada tradicional. El gallardón ta dotáu con 6.000 euros.

El xuráu destacó que'l trabayu d'Hector Braga ye una «aportación al estudiu y divulgación de la música y cultura asturianes nun trabayu rigorosu y bien documentáu sobre l'asturianada atendiendo a toles estayes qu'intervienen nesta gran seña cultural d'Asturies». Amás, el fallu resalta «l'usu del llinguaxe, natural, fluyíu y correctu qu'imprime axilidá y amenidá  a la llectura de la obra».

Nesta edición del Máximo Fuertes Acevedo, y cola presidencia de la xefa del Serviciu de Planificación Llingüística, Juncal Mónica García Velasco, por delegación del director xeneral d'Acción Cultural y Normalización Llingüística, Antón García, el xuráu tuvo formáu pola filóloga Marta López Fernández, el filólogu Jorge Arturo Sierra Álvarez y Damián Barreiro Maceiras, periodista y ganador de la edición pasada del gallardón. Actuó de secretaria Lourdes Álvarez García, filóloga adscrita a la Viceconseyería de Cultura, Política Llingüística y Deporte.

Héctor Braga Corral (1980) ye doctor n'Historia del Arte y Musicoloxía pola Universidá d'Uviéu, profesor superior de Música y Etnomusicoloxía polos Conservatorios d'Asturies y Castiella-Llión, títulu profesional de Gaita y máster en Comunicación Cultural. Miembru de la Sociedá española de Musicoloxía (SEdeM), ye tamién autor d'una ventena d'artículos d'investigación en revistes especializaes. 

Nel ámbitu de la interpretación vocal de l'asturianada foi campeón en toles categoríes (aficionaos, renovación y absoluta) y ganador en bien de concursos entamaos en Xixón, Mieres o Samartín del Rei Aurelio, ente los años 2007 y 2015. Anguaño dedícase a la docencia.