L'espectáculu El gorrumbu, de Saltantes Teatro, ye'l ganador del VII Premiu «Nel Amaro» de Teatru profesional n'asturianu. El xuráu destacó qu'El gorrumbu «actualiza una obra clásica, alternando ente la realidá de la quema de Notre Dame de París y la ficción de los personaxes de Quasimodo y Esmeralda de Victor Hugo», y resalta amás «la escenografía tan llamativa, que convierte l'escenariu nun espaciu multidimensional, y el trabayu actoral, qu'ufierta escenes de muncha emoción y tenrura».

Esti xuráu taba integráu pola crítica teatral Eva Vallines, l'actriz María Cotiello y los escritores Chechu García y Milio Ureta. El director xeneral d'Acción Cultural y Normalización Llingüística, Antón García, exerció de presidente y Laura Marcos, filóloga adscrita al Serviciu de Planificación Llingüística, de secretaria. 

Los actores Carla Loga y Enrique Dueñas dan vida al testu de Luis Alija, traducíu al asturianu por Laura Iglesia, onde interpreten dellos personaxes ente los que tán los obreros qu'intervinieron na quema de Notre Dame, l'autor Victor Hugo y los personaxes de Quasimodo y Esmeralda. Amás, la obra, pa tolos públicos, contién tamién escenes musicales. 

El gorrumbu llegó a la final del Nel Amaro coles producciones Xuan Soldáu (Carlos Alba) y Caperucita en Muniellos (Escenapache). Estos espectáculos representáronse a lo llargo del mes d'ochobre nel Teatru Filarmónica d'Uviéu, nel Festival de Teatru Nel Amaro. Nesta edición, amás, el festival incluyó la representación de les obres La reina de la guapura de Leenane, de Nun Tris, y Les madreñes vacíes, de Carlos Alba, ganadores de los años 2021 y 2022, respectivamente. 

El gallardón, promovíu pola Conseyería de Cultura, Política Llingüística y Deporte, tien por oxetu afianzar, arriquecer y prestixar l'asturianu y l'eonaviegu nel ámbitu del arte dramáticu, y ta dotáu con 6.000 euros. Amás, l'espectáculu va incluyise nel circuitu Autores nel Camín y  va promovese la so representación per tol territoriu asturianu. 

El premiu y festival lleva'l nome de Nel Amaro, autor a quien se dedicó nel 2021 la 42 Selmana de les Lletres Asturianes y qu'a últimos de la década de los setenta del sieglu pasáu abrió'l camín pa la vanguardia teatral n'asturianu. Ente les sos obres de teatru destaquen Xénesis o alborá de la concencia (1978); Glayíos nueos, vieya murnia (1979); L'únicu rebalbu (1980) y Antígona, por exemplu, que ganó'l Premiu de teatru de l'Academia de la Llingua Asturiana en 1991. Les manes en caxón (2003) foi la so última publicación teatral.