El Gobiernu d'Asturies va homenaxar al escritor Xosé Álvarez, Pin, na 46 Selmana de les Lletres Asturianes, que va celebrase nel 2025. La Conseyería de Cultura, Política Llingüística y Deporte yá empezó los trabayos pa iguar la programación cultural que va rindir homenaxe a Pin, autor del llibru de rellatos Fíos de naide, ún de los cuentos más sobresalientes de la producción lliteraria de los años setenta y ochenta del sieglu pasáu.

D'esta manera, Cultura va homenaxar a ún de los máximos esponentes de la lliteratura asturiana na diáspora, porque Pin caltuvo viva la cultura asturiana dende Arxentina, onde emigró bien mozu cola madre dende Balmonte, y más tarde dende Madrid. Dende'l país arxentín caltuvo una rellación sobre manera emocional con Asturies y la so lliteratura, y dende la capital española siguió nutriendo la lliteratura infantil en llingua asturiana y vinculóse a asociaciones bien actives na defensa de les llingües y cultura d'Asturies, yá que formó parte de Conceyu d'Asturies en Madrid.

Al traviés de la figura d'Álvarez, la Conseyería de Cultura quier poner en valor el papel de la emigración na salvaguarda de la lliteratura y la llingua asturiana. Por ello, va poner en marcha un ambiciosu programa en collaboración colos centros asturianos col fin de reconocer y visibilizar a aquelles persones y iniciatives que, dende la diáspora, mantuvieron viva la cultura asturiana como principal pilar de la so identidá y qu'asina lo tresmitieron a les xeneraciones siguientes. D'otra manera, la cultura y la llingua fueron llazos que permitieron abrazar a la patria d'orixe dende la distancia y hermanase con otros semeyantes, al tiempu qu'instituyeron a la emigración asturiana como embaxadora d'Asturies que contaxó'l so vital sentimientu d'asturianía a numberoses persones nos diferentes países d'acoyida.

Pin, un emigrante y activista adelantáu al Surdimientu

Xosé Álvarez, Pin, naz en Cigüedres, conceyu de Miranda, en 1948. Mui pequeñu emigra cola madre pa L'Arxentina, volviendo de rapaz pa vivir en Madrid. Polo tanto, la so vinculación con Asturies y la so cultura foi fundamentalmente emocional. Trabaya nos coches-cama de la RENFE, pa terminar la so vida llaboral como emplegáu de banca.

Adelántase cuasi nuna década al Surdimientu, escribiendo'l so primer cuentu n'asturianu en 1966, con 18 años. En 1970 la revista Asturias Semanal publíca-y una carta n'asturianu, la primera de la revista onde cuatro años más tarde diba nacer Conceyu Bable. En 1973 gana'l concursu de cuentos que convocaba'l Muséu del Pueblu d'Asturies en Xixón, alredor de les iniciatives de l'Asociación d'Amigos del Bable.

En 1975, na Facultá de Ciencies de la Información de Madrid, empiecen a reunise un grupu d'asturianos que terminen formando l'Asociación Conceyu d'Asturies en Madrid en 1976, que llegó a tener local propiu en Fuencarral, publicó dos revistes (Restallu y El Picatueru), convocó dellos concursos de poesía y narración..., siempre al rodiu del trabayu de Xosé Álvarez, alma d'esti Conceyu. Foron munchos los asturianistes vinculaos a esti grupu: Neto, Fonsu Velázquez, Xuan Cándano, Xelu Neira, Xicu Yepes, Xulio Llaneza, Pepa Fernández, Xulio Ramos, Xosé María Rodríguez, Roberto González-Quevedo, Javier Cuartas, Carme Tineo, Celia Cardo, Mario Bango, Antonio Palicio, Cándida Domínguez, Maestru Casanova, Alfredo Huergo, David Rivas, Llarina Rodríguez... A partir de 1984 Xosé Álvarez abre un paréntesis nel so activismu, cesando l'asociación na so actividá.

Nos años ochenta publicó trés llibros en Madrid: El bable de Xuanín ia outrus cuentus (1980), que ye la primer recopilación narrativa d'un autor del Surdimientu; Fíos de naide (1981) y Los tres reis (1983), ún de los primeros llibros infantiles de la época. La so producción narrativa quedó recoyida nel volume Cuentos (2000). Miembru correspondiente de l'Academia de la Llingua Asturiana, esta institución publicó-y nel 2011 un mui interesante Vocabulariu de Miranda, el trabayu de toa una vida de recopilación de palabres y espresiones del so conceyu natal. Tamién dexó fechos trabayos de recoyida de refranes.

Recibió l'Urogallo de Bronce na categoría lliteraria del Centru Asturianu de Madrid en 1990, y dio nome a un concursu de cuentos n'asturianu que convocaba esi mesmu centru nel empiezu d'esti sieglu.

Hacia l'añu 2000 regresó al activismu llingüísticu y cultural, cola idea de volver a poner en marcha'l Conceyu d'Asturies en Madrid, pero morría de sópitu en Cigüedres, onde pasaba unos díes, nel 2001.