El Gobiernu d'Asturies homenaxa a Conceyu Bable na 45 Selmana de les Lletres Asturianes, que se va desenvolver del 29 d'abril al 8 de mayu. Esti movimientu , que tuvo un papel bien importante na defensa de la llingua y la cultura d'Asturies na transición democrática, centra la programación d'esta cuadraxésima quinta edición.

Los actos, qu'incluyen esposiciones, conciertos, meses redones y presentaciones, amás de la entrega de premios de los certámenes escolares, van tar repartíos ente Uviéu, Xixón, A Veiga, y Corvera. 

El llunes 29 a les 12:00 , el salón d'actos de la Biblioteca d'Asturies (Uviéu) va acoyer la inauguración la 45 Selmana de les Lletres Asturianes, cola proyección del documental Conceyu Bable: entamar los llabores de casa, y l'apertura de la muestra 50 aniversariu de Conceyu Bable. Esposición de materiales, onde van poder vese oxetos de la época como pegatines, carnés de sociu o folletos. 

Esi mesmu día, a les 19:00, preséntase nel salón d'actos del Real Institutu d'Estudios Asturianos el llibru colectivu Conceyu Bable. El frutu y la semiente, con Paco Álvarez, coordinador del llibru, Arantza Margolles y Ramón d'Andrés. 

El martes 30 inaugúrase nel Muséu de Belles Artes d'Uvéu la esposición Conceyu Bable y l'arte contemporaneu, de la que va poder facese una visita guiada n'asturianu esi mesmu día a les 18:00 h. Darréu, va facese nesi mesmu sitiu un espectáculu poético-musical n'homenaxe al Nueu Canciu Astur cola intervención de Xaime Martínez y la Familia Tradicional, Mapi Quintana, L-R y Izar Gayo. 

El xueves 2 de mayu, a les 19:00, va facese nel salón d'actos de la Biblioteca Xovellanos de Xixón la mesa redonda 50 aniversariu de Conceyu Bable: testigos del entamu, moderada por María Xosé Rodríguez, na que van intervenir antiguos socios de Conceyu Bable como Vicente García Oliva, Lluis Antón González, Amalia Trancho y Xuan Xosé Sánchez Vicente. 

A les 20:00 h, el Auditoriu Príncipe Felipe va acoyer el Conciertu de les Lletres Asturianes, al cargu de la Orquesta Sinfónica del Principáu d'Asturies (OSPA). La información d'esti actu pue consultase na noticia anterior. 

El vienres 3 de mayu, Día de les Lletres Asturianes, inaugúrase la esposición nel Archivu Históricu d'Asturies Conceyu Bable nel so tiempu. L'Asturies de va mediu sieglu. 

Esi día, cola compra d'un llibru o discu nes 53 llibreríes participantes, va repartise'l llibru-regalu Conceyu Bable: el frutu y la semiente pa los llibros n'asturianu y el llibru infantil Dedín, dedín... de Belén Rico Prieto pa los llibros n'eonaviego. 

Los actos dedicaos al públicu escolar van facese a la selmana siguiente. El llunes 6 de mayu a les 11:30 preséntase'l llibru Dedín, dedín... na escuela pública Xovellanos d'A Veiga, y el martes a les 10:30 en Corvera va facese la entrega de los certámenes escolares, qu'esti añu incluyen Creación Artística/Lliteraria, Creación Audiovisual, Cartelismu, Teatru escolar y, pela primer vez, podcasts. 

El programa recueye, amás, actos que se van facer na Rede de Normalización Llingüística nos Conceyos, concretamente na Comarca de la Sidra, Avilés y Corvera. 

Descarga'l programa de la 45 Selmana de les Lletres Asturianes nesti enllaz.