El VI Festival Nel Amaro de Teatru profesional en llingua asturiana o eonaviegu va volver a enllenar l’escenariu del Teatru Filarmónica d’Uviéu nos vienres del mes d’ochobre, como vien faciendo estos años dende la creación del Festival.

Esti añu 2022 van ser los díes 7, 14 , 21 y 28 d’ochobre los qu’acueyan les representaciones de les obres escoyíes pol xuráu na primer fase del Premiu Nel Amaro, onde se seleccionen les finalistes que van optar al gallardón.

 

Les compañíes seleccionaes van tener que representar en directo la  obra pa que’l xuráu pueda apreciar les sos cualidaes escéniques y interpretatives, nuna representación abierta al públicu xeneral con entrada llibre y gratuita. N’acabando estes, el xuráu determinará la obra ganadora d’esta edición. En 2021 la obra gallardonada foi “La reina de la guapura de Leenane”, de Martin McDonagh, de la compañía Nun Tris.

 

Al Premiu Nel Amaro de Teatro Profesional, dotáu con 6.000 euros y troféu, puen presentase empreses dedicaes a la producción d’espectáculos teatrales, con una obra yá estrenada y representada en llingua asturiana o gallego-asturianu, según les indicaciones espresaes na convocatoria correspondiente, que se va publicar  nos próximos meses.  La obra ganadora va integrase nel circuitu “Autores nel Camín” del 2023.