Les conseyeríes d'Educación y de Cultura, Política Llingüística y Turismu ellaboraron a comuña dos guíes interactives con información y conteníu educativu dirixíes a facilitar el llabor del profesoráu de llingua asturiana y de gallego-asturianu o eonaviegu.

L'Estoyu d'estímulos y recursos dixitales pa la enseñanza del asturianu ordena y clasifica unos 300 recursos, mentes que l'Estoiro d'estímulos y recursos dixitales prá enseñanza del gallego-asturiano ou eonaviego incorpora unos 150. Dambos documentos, que se presenten en formatu pdf interactivu, tán publicaos nel portal d'Educastur: https://tinyurl.com/estoyuestoiro   

Los conteníos educativos de les guíes tienen procedencies diverses:

--Materiales editaos pol Gobiernu d'Asturies y la Conseyería d'Educación como apoyu a la enseñanza del asturianu.

--Centros de profesores que, nel so ámbitu d'actuación, comparten recursos pa estes guíes.

--Docentes del sistema educativu que comparten los sos materiales.

--La rede de Servicios de Normalización Llingüística municipales, qu'incorporen los sos materiales de promoción.

--Los grupos de trabayu de renovación educativa y ellaboración de materiales dixitales de la Dirección Xeneral d'Ordenación, Evaluación y Equidá Educativa.

--Páxines web d'asociaciones, entidaes privaes, periódicos dixitales, etcétera, que xeneren información de forma abierta al públicu.

--Entidaes públiques, conceyos, mancomunidaes y equipamientos culturales, ente otros, con recursos y materiales multimedia que s'ufierten pa la comunidá educativa.

Los estudios tán pensaos pa los docentes, que van ser los responsables de valorar, escoyer y adaptar aplicaciones didáctiques pal so alumnáu y la so realidá socioeducativa. 

Les guíes clasifiquen los conteníos de forma cenciella, cola mira de facelos fácilmente localizables. Asina, utilicen categoríes qu'identifiquen cada recursu, asignándolos a una etapa concreta, y describen los sos posibles ámbitos d'aplicación.

Los servicios d'Ordenación Académica y Evaluación Educativa (Conseyería d'Educación) y de Planificación y Conocimientu de la Llingua Asturiana (Conseyería de Cultura, Política Llingüística y Turismu) fueron los encargaos d'ellaborar estes ferramientes docentes a lo llargo d'esti cursu.