La Conseyería de Cultura, Política Llingüística y Deporte amplía la protección de la toponimia asturiana con un decretu nuevu que dexa caltener y oficializar nomes tradicionales de la toponimia menor, una parte muncho más  amplia del territoriu cola que se reforcia la protección d’esti patrimoniu llingüísticu y cultural de la comunidá autónoma: Decretu 47/2026, de 22 de xunu, pol que s'establez el procedimientu de recuperación y fixación de la toponimia asturiana.

La norma, publicada'l día 2 de xunetu nel Boletín Oficial del Principáu d'Asturies (BOPA), va dexar estender pela primer vez la recuperación y fixación de topónimos tradicionales a espacios qu'hasta agora quedaben fuera del procedimientu oficial, como playes, montes, ríos, caminos, puertos, árees xeográfiques, espacios naturales protexíos o bienes patrimoniales de titularidá autonómica. 

Hasta agora, el procedimientu d'oficialización de la toponimia incluyía namás parroquies y núcleos de población. El decretu nuevu sustituye a la norma vixente dende'l 2002 y actualiza un procedimientu qu'hasta agora resultaba insuficiente pa dar respuesta a la diversidá y riqueza del territoriu asturianu.

Esta ampliación va dexar caltener una parte esencial del patrimoniu cultural inmaterial d'Asturies. La toponimia tradicional constituye una espresión singular de la memoria colectiva y del vínculu históricu de la ciudadanía col territoriu, amás de desempeñar un papel fundamental nel caltenimientu y tresmisión del patrimoniu llingüísticu asturianu.

El decretu reforcia, amás, el papel de la Xunta Asesora de Toponimia del Principáu d'Asturies, órganu consultivu encargáu d'emitir los dictámenes técnicos previos a l'aprobación de les denominaciones oficiales, y establez un procedimientu más afayadizu pa encarar la complexidá de les distintes realidaes xeográfiques de la comunidá.

Desque s'oficialicen, los topónimos aprobaos van pasar a integrase nel Sistema Cartográficu del Principáu d'Asturies y van formar parte del so Nomenclátor Xeográficu oficial, cola correspondiente xeorreferenciación. Esto va facilitar que les alministraciones públiques, los servicios cartográficos y la ciudadanía puedan usalos de forma homoxénea.