El Premiu «Pachín de Melás» de Testos teatrales yá tien el so primer ganador. La obra Flashback foi escoyida pol xuráu na reunión celebrada'l miércoles 25 d'ochobre pol «arte col que remana'l xéneru de la comedia y l'habilidá pa integrar númberos musicales nuna obra de tonu ácidu y irreverente que trata temes de la historia asturiana recién». Amás, destaca, «failo presentando una trama mui ellaborada qu'avanza de manera áxil y dinámica al traviés de personaxes mui auténticos que dexen patente'l dominiu del rexistru coloquial del asturianu». N'abriendo la plica, el ganador resultó ser Dolfo Camilo Díaz.

El xuráu taba formáu por Henrique Facuriella, escritor y traductor; Verónica Gutiérrez González, actriz y directora de la compañía É Vero Teatro, y Begoña Quirós, actriz y profesora de la Escuela Superior d'Arte Dramáticu del Principáu d'Asturies. Antón García, director xeneral d'Acción Cultural y Normalización Llingüística, actuó como presidente, y Laura Marcos, filóloga adscrita al Serviciu de Planificación Llingüística, como secretaria. 

El Premiu «Pachín de Melás» de Testos teatrales n'asturianu ta dotáu con 6.000 euros y contempla, amás, la coedición del testu y la coproducción de la obra con una compañía profesional, aparte del compromisu d'incluyila ente les actividaes culturales promovíes pola Alministración del Principáu. El Gobiernu d'Asturies impulsa anguaño pela primer vez el gallardón pa promover la creación y incentivar la puesta n'escena d'obres de teatru n'asturianu. El premiu lleva'l nome del alcuñu pol que se conoció al dramaturgu Emilio Robles Muñiz (Xixón, 1877-1937), fundador de la corriente costumista o teatru asturianu de la naturaleza.

Dolfo Camilo Díaz (Caborana, 1963) ye dramaturgu y escritor. Foi cuatro veces gallardonáu col Premiu «Xosefa Xovellanos» de Novela n'asturianu (con Añada pa un güeyu muertu, Diariu de viaxe, Imago y Advenimientu), dos veces gallardonáu col Premiu «Montesín» de Novela Xuvenil n'asturianu (con Khaos y Memorial del monstruu) y, amás, algamó'l Premiu «María Josefa Canellada» de Lliteratura Infantil y Xuvenil con La mar. Nel ámbitu teatral, ye fundador, director y actor de les compañíes de teatru Guaxa (1980), Güestia (1981) y Grupu de Teatru Universitariu Amorecer (1982). Tien estrenaes una ventena d'obres al cargu de compañíes como Margen, Higiénico Papel, Nun Tris, ente más otres, amás de les compañíes propies. Tien publicaes siete obres de teatru, de les que destaquen País (Madú Ediciones, 2003), Psicokiller (ALLA, Colección Mázcara 1992) o Nueche (Ámbitu, 1996). Ye creador de la Colección Mázcara de Teatru de l'Academia de la Llingua Asturiana.
 

llinguastur.general.info-complementaria