Les obres teatrales de les compañíes Elektrafiktion, Guayominí Producciones, Higiénico Papel Teatro y Luz de Gas Teatro foron escoyíes como finalistes del X Premiu Nel Amaro de Teatru Profesional n'asturianu. Esti gallardón, convocáu pola Conseyería de Cultura, Política Llingüística y Deporte, tien como oxetivu impulsar la profesionalización de la industria cultural asturiana, con atención especial al sector de les artes escéniques.

Les propuestes que van competir nesta edición del premiu son:

• Arde la viesca, d'Elektrafiktion.
• caLORCAlor, de Guayominí Producciones.
• Riquete'l del copete, d'Higiénico Papel Teatro.
• Dibúxame una pallabra, de Luz de Gas Teatro.

El premiu, dotáu con 6.000 euros, reconoz la meyor obra en llingua asturiana o eonaviegu, atendiendo a criterios de calidá escénica, lliteraria y llingüística.

La valoración de les propuestes realizóla un xuráu presidíu por Juncal García Velasco, xefa del Serviciu de Planificación y Normalización Llingüística y integráu, amás, pola actriz y filóloga María Cotiello; la profesora y investigadora Azucena Álvarez; l'escritor y profesor Xuan Santori; l'escritor y director Sergio Buelga; y l'actriz y crítica teatral Eva Vallines.

El tribunal destacó que les cuatro obres finalistes tán orientaes al públicu más mozo, lo que contribuye a averar el teatru n’asturianu a xeneraciones nueves y favorez la creación de nuevos públicos.

La X edición del Festival Nel Amaro de Teatru, nel que se van representar les obres finalistes, va celebrase nel Teatru Filarmónica d’Uviéu los vienres 2, 9, 16 y 23 d'ochobre. Como prólogu al certame, el 25 de setiembre va ponese n'escena, nel mesmu espaciu, Tía Miseria, de Covenant Producciones, obra ganadora de la edición del 2025.

El montaxe que resulte vencedor va incorporase al circuitu Autores nel Camín del programa ‘Asturies, Cultura en Rede’.

Esti premiu y el festival rinden homenaxe al autor turonés Nel Amaro (1946-2011), una figura de referencia na vanguardia del teatru n’asturianu, a quien tamién se dedicó la Selmana de les Lletres Asturianes nel 2021.