La compañía Higiénico Papel Teatro, encabezada pola actriz y dramaturga Laura Iglesia, lleva’l premiu Nel Amaro de Teatru Profesional n’asturianu y gallego-asturianu na edición correspondiente al añu 2020 con El viaxe de Covaletti. 

Esta obra, empobinada a tolos públicos pero n’especial a lo más mozo, ta interpretada en forma de monólogu pol actor Carlos Dávila y  na opinión del xuráu del premiu «amuesa la capacidá actoral pa crear mundos ficcionales a los que tresporta al espectador, con una caracterización mínima, poniendo en valor la humanización de la llectura lliteraria entendida como’l sofitu qu’asiste a les persones en tiempos de soledá, igual qu’asocede nestos tiempos de pandemia». 

Pa la fase final del premiu, dotáu con 6.000 euros, taben seleccionaes tamién les obres El viaxe de Dorothy (Fantastique Company), La neña de les trences del revés (El Callejón del Gato) y El pelegrín valiente (Nun Tris Producciones). Estes obres pudieron vese nel Festival Nel Amaro, celebráu a lo llargo del mes d’ochobre nel Teatru Filarmónica d’Uviéu. 

El viaxe de Covaletti pue vese íntegramente nesti enllaz de Youtube por cortesía de la Estaya de la Llingua del Conceyu d’Avilés y Cuatro Gotes producciones.