La obra La cafiante muerte de Nicolai Bostov, del escritor José Ángel Gayol foi la ganadora de la 42 edición del Premiu «Xosefa Xovellanos» de Novela. El gallardón, convocáu y concedíu pola Conseyería de Cultura, Política Llingüística y Turismu, tien una dotación de 6.000 euros. 

Los miembros del xuráu destacaron que la obra de José Ángel Gayol «ye una sátira social con un ritmu narrativu bien llográu que retrata la sociedá asturiana de finales del sieglu XX con humor esperpéntico, y too ello espresao con un rexistru llingüísticu de muncha calidá y naturalidá».

El xuráu encargáu de valorar los trabayos, reuníu baxo la presidencia del director xeneral de Política Llingüística, Antón García, tuvo formáu poles escritores Pilar Arnaldo y Marta Mori, la llibrera Natalia González, el filólogu Marcos Martínez, y Sidoro Villa, maestro, escritor y ganador de la anterior edición del Xosefa Xovellanos.

José Ángel Gayol (Mieres, 1977) ye escritor y críticu lliterariu. Llicenciáu en Derechu y n’Antropología Social y Cultural, y Máster n’Historia y Análisis Sociocultural, ye autor d’otres dos noveles, cinco poemarios,  trés ensayos y un volume de diarios. Con El llibru de les coses misterioses (2013) foi ganador del Xuan María Acebal de Poesía, y los sos ensayos Vértigu. L’Atracción del abismu na sociedá contemporánea (2015) y El silenciu invisible (2019) foron gallardonados col Máximo Fuertes Acevedo. Gayol llogró tamién el Premiu de la Crítica de narrativa n’asturianu en 2020 cola obra En primera persona.
 

llinguastur.general.info-complementaria