Les conseyeríes d’Educación y de Cultura,  Política Llingüística y Turismu punxeron en marcha la campaña #Apúntate cola mira d’animar al alumnáu a matriculase nes asignatures de Llingua Asturiana y Lliteratura  y de Gallego-Asturianu pal cursu 2020-21. Dambos departamentos señalaron que cola promoción quier facese llegar a la sociedá, y n’especial a les persones implicaes na enseñanza, el compromisu del Gobiernu asturianu pa cola llingua asturiana y el gallego-asturianu.   

La declaración del estáu d’alarma’l pasáu mes de marzu retardó tanto’lprocesu de matriculación nos centros como’l llanzamientu de la campaña. Agora, n’estableciéndose les feches de matrícula pola Conseyería d’Educación, actívase la promoción.
La campaña #Apúntate ta diseñada pa llegar a los centros educativos al traviés de cartelería impresa, y pa espublizase peles redes sociales y internet al traviés de cartelería dixital. Pa dala a conocer al públicu, la promoción apóyase en cuñes radiofóniques que se van emitir na RPA y nun anunciu de televisión que se va dar pela TPA, amás d’al traviés de les redes sociales del Gobiernu d’Asturies. La promoción ta realizada n’asturianu y en gallego-asturianu tanto na cartelería como nos anuncios radiofónicos y el spot de televisión.

La campaña trata de promocionar la matriculación n’asturianu, o en gallego-asturianu nel so ámbitu, en caúna de les fases educatives. Les feches pa realizar la matrícula estableciéronse del 23 al 31 de xunetu pa Educación Primaria, y del 23 al 31 de xunetu y 1 a 7 de setiembre pa la ESO y Bachilleratu.