El Premiu de Guión Cinematográficu en llingua asturiana y eonaviegu, promovíu pola Conseyería de Cultura, Política Llingüística y Deporte, reconoció’l trabayu de María Ruisánchez Ortega (Ouviñana, 1983), autora del guión ¡A lo xo! El gallardón, que tien una dotación de 6.000 euros, ye una muestra del trabayu del Gobiernu d'Asturies pa promover y divulgar les llingües autóctones y afianzar la so presencia nel ámbitu cultural y audiovisual.

El xuráu d'esta edición presidiólu'l director xeneral d'Acción Cultural y Normalización Llingüística, Antón García Fernández, y integráronlu los cineastes Diego Flórez y Samuel Fernandi, los profesores Enrique García y Yedra Riesgo, y la directora del Centru Integráu de Formación Profesional pa la Comunicación, Imaxe y Soníu de Llangréu (CISLAN), María Isabel Lugilde.

Al xuiciu del xuráu, la obra ganadora supón «una propuesta innovadora qu'incorpora de manera suxerente l'animación pa construyir la historia d'un territoriu y una dómina que tien les señes d'identidá del nuestru pasáu colectivu al traviés de los güeyos d'una neña». El fallu destaca tamién «l'usu de referencies culturales asturianes e internacionales, amás de la construcción coherente y realista de los personaxes femeninos», que dexa encarar con naturalidá asuntos como la memoria democrática y les rellaciones interxeneracionales.

El Premiu de Guión Cinematográficu distingue obres orixinales y inédites creaes pa llargumetraxes de ficción o animación. Con esti reconocimientu, Cultura quier fomentar la escritura de guiones cinematográficos orixinales en llingua asturiana o eonaviegu, al tiempu qu'apoya al sector audiovisual de la comunidá. 

María Ruisánchez Ortega ye llicenciada en Periodismu pola Universidá Complutense, onde cursó tamién un máster d'estudios lliterarios, y graduada en Guión de Cine y Televisión pol Institutu de Cine de Madrid. La so esperiencia como guionista en diversos formatos incluye trabayos pa RTVE, Cuatro, Neox, Antena 3, La Sexta, Amazon Prime o Playz, y collaboraciones como freelance pal Grupo Prisa o la productora El Terrat, d'Andreu Buenafuente. Tamién escribió la serie de ficción sonora Mix97, emitida en Radio Catalunya y nominada a Meyor Podcast de ficción, y ye coatuora de la película IXTAB: Evil Legacy. 

Na so faceta lliteraria, ye autora de les noveles El inventor de sombras, Dimos vueltas en la noche y fuimos consumidos por el fuego y KAOS. Llogró l'accésit nel Premiu de Relatu Curtiu Luis Landero por Aleste y foi finalista nel VIII Concursu de Relatu de Mujeres Viajeras con una crónica sobre un viaxe a Llíbano. D'otra manera, foi una de les gallardonaes na Muestra d'Artes Plástiques del Principáu d'Asturies 2017 cola obra Miénteme. Retóricas mediáticas.