La traducción al asturianu de Caleyos de la memoria, de la escritora brasileña Conceição Evaristo, realizada por Henrique Facuriella, ganó la sesta edición del Premiu Florina Alías a la meyor traducción al asturianu. El gallardón, concedíu pola Conseyería de Cultura, Política Llingüística y Deporte, reconoz la calidá de la traducción y la so aportación al patrimoniu lliterariu en llingua asturiana.

El fallu publicóse'l 30 de setiembre, coincidiendo col Día Internacional de la Traducción, una fecha que pon el focu precisamente nos que tienden pontes ente llingües y faen posible qu'una obra atope llectores nuevos más allá del idioma nel que foi escrita. Nel casu del asturianu, traducir significa tamién enanchar l'espaciu de la llingua, incorporar voces y tradiciones lliteraries nueves y facer accesibles dende ella histories nacíes n'otros contestos culturales.

Esa capacidá ta especialmente presente, a xuiciu del xuráu, nel trabayu de Henrique Facuriella. El tribunal destaca qu'en Caleyos de la memoria “fluye la traducción”, con una elección bien curiada de les palabres y una especial cercanía a la oralidá. Tamién valora la naturalidá cola que tán escrites les histories, hasta'l puntu de facilitar la so llectura y comprensión inclusive a los que nun falen davezu asturianu.

El xuráu considera, amás, que Facuriella consigue una traducción axustada al orixinal, capaz de caltener el so estilu poéticu con bon ritmu y control léxicu. A la calidá del trabayu súmase'l valor cultural y social de la obra de partida, otru de los elementos que tien en cuenta el Florina Alías amás de l’aportación que cada traducción fai al patrimoniu cultural d'Asturies.

El xuráu d'esta sesta edición tuvo presidíu pol director xeneral d'Acción Cultural y Normalización Llingüística, Antón García Fernández, y integráu por Loreto Díaz Suárez, Solinca Turbón Cuesta, José Luis Rendueles Antón, Javier Martínez Concheso y Pablo Texón Castañón. M.ª Dolores Rodríguez Vázquez, responsable de promoción del asturianu adscrita a la Dirección Xeneral d'Acción Cultural y Normalización Llingüística, actuó como secretaria.
 

llinguastur.general.info-complementaria