La Conseyería de Cultura, Política Llingüística y Turismu pon en marcha la campaña Ye nuestra, ye pa ti / É nosa, é pra ti, p'animar al alumnáu y les families a matriculase n'asturianu y eonaviegu nes etapes educatives de Primaria, ESO y Bachiller.

La iniciativa, promovida dende la Dirección Xeneral de Política Llingüística en collaboración cola Radiotelevisión del Principáu d’Asturies, ta conformada por cinco anuncios n'asturianu y dos n'eonaviegu protagonizaos por miembros de la comunidá educativa asturiana que cunten les esperiencies positives que trai l'estudiu y conocimientu de les llingües propies.

Cada anunciu presenta trés intervenciones de miembros de la comunidá educativa: alumnes y alumnos, families, profesoráu y tamién ex-alumnos que cursaron estes asignatures na so etapa escolar. Pa la realización de la campaña entrevistóse a más de 30 persones de dellos puntos d'Asturies y cuntóse cola collaboración del profesoráu y alumnáu de centros educativos de Mieres, Ribeseya, Villayón y Santalla d'Ozcos, ente más otros. 

Los spots, realizaos por José Antonio Braña, van emitise nel periodu ente'l 16 de mayu y el 15 de xunetu, y muestren les respuestes de les distintes persones a la pregunta que-yos fixeron según el so perfil: ¿Por qué escoyéis Llingua Asturiana / Eonaviegu? (families); ¿Por qué te presta aprender Llingua Asturiana / Eonaviegu? (alumnáu); ¿Qué-yos aporta a los neños y neñes l'asignatura de Llingua Asturiana / Eonaviegu? (profesoráu) y ¿Qué t'aportó Llingua Asturiana / Eonaviegu na ESO y el Bachiller?

La campaña va complementase nes selmanes vinientes col unviu a los centros educativos de carteles y folletos pa repartir ente l'alumnáu y les families y la puesta en marcha d'una páxina web que va recoyer los vídeos grabaos y tola información rellacionada.