Na última xunta d'esta selmana, el Conseyu de Gobiernu del Principáu aprobó la toponimia oficial correspondiente al conceyu de Cabrales, depués de que'l plenu del ayuntamientu alcordara por unanimidá validar el dictame emitíu pola Xunta Asesora de Toponimia. A partir d'esta decisión, les alministraciones públiques van dir afaciendo los mapes y planos oficiales y gradualmente les señalizaciones pa que figuren nellos les formes toponímiques establecíes nel decretu aprobáu'l miércoles.

Completar la revisión y oficialización de la toponimia tradicional d'Asturies va facilitar la so aplicación práctica poles alministraciones y los particulares. Amás, va permitir que dea empiezu'l procedimientu que regule la recuperación de los nomes de los principales accidentes xeográficos (ríos, montes, sableres, cabos, golfos, llagos, etc.). Esti últimu procesu va riquir un nuevu decretu regulatoriu.

La Xunta Asesora de Toponimia ocupóse, hasta la fecha, d'emitir dictame sobre los nomes tradicionales de les capitales, les parroquies rurales y los núcleos de población de los 78 conceyos. El Conseyu de Gobiernu yá aprobó la oficialización d'estos nomes tradicionales nel casu de 67 conceyos, depués de que los respectivos plenos dieren el preste a los dictames correspondientes. La Conseyería de Cultura, Política Llingüística y Turismu quier rematar esti procesu en 2022, en completando la oficialización de les poblaciones de los 11 conceyos restantes y una y bones se ponga en marcha'l procesu pa la oficialización de los nomes de los 78 conceyos.