La Conseyería de Cultura, Política Llingüística y Turismu punxo en marcha la campaña de promoción pa la matriculación del alumnáu de Primaria y Secundaria en llingua asturiana o eonaviegu de cara al cursu escolar viniente. La conseyería d'Educación va abrir los plazos de solicitú dende'l próximu 24 d'abril hasta'l 5 de mayu. Depués, los alumnos y alumnes de Primaria van tener que formalizar la matrícula del 20 al 27 de xunu, y los de Secundaria y Bachilleratu del 3 al 14 de xunetu. 

Col títulu Nun ye días máis voltas / Nun-y deas más vueltes, la campaña incide en que la conocencia de les llingües propies d'Asturies ye un derechu del alumnáu qu'amás tien munches ventayes pal so desenvolvimientu personal y académicu, dende la meyora na competencia comunicativa hasta una autoestima mayor, amás del fomentu de la sensibilidá pa cola diversidá cultural.

Los spots y cuñes de la campaña, que van emitise na Radio Televisión del Principáu d’Asturies y divulgase en redes sociales, recueyen testimonios personales del alumnáu, les families y los docentes de llingua asturiana y eonaviegu. El públicu interesáu pue atopar tolos materiales informativos de la campaña na web www.nunydeasmasvueltes.es. Amás, la Dirección Xeneral de Política Llingüística empecipió yá'l repartu de los dípticos y cartelos informativos na rede de centros educativos.