El director xeneral d'Acción Cultural y Normalización Llingüística, Antón García, y la directora xeneral d'Inclusión Educativa y Ordenación, María Dolores Bueno, presentaron na Llaboral la edición nueva  de la Xira Didáctica, una iniciativa qu'axunta educación y cultura y avera al alumnáu a les llingües propies del Principáu, al asturianu y al eonaviegu, al traviés de propuestes diseñaes específicamente pa toles etapes educatives.

La edición d'esti cursu, que cunta tamién con financiamientu del Ministeriu de Cultura, incluye 92 funciones y actividaes gratuites en 36 conceyos y amplía'l so algame con rellación al cursu pasáu, tanto pola variedá de la programación como pola so estensión nel territoriu: la Xira pasa de 30 a 46 proyectos, de 26 a 37 compañíes, profesionales y entidaes y de 30 a 36 conceyos.

Artes escéniques, música, lliteratura, cultura tradicional, cine y ciencia formen parte d'un catálogu dirixíu a escolinos dende Infantil hasta Bachilleratu. L'alumnáu va poder disfrutar de propuestes creaes pola industria cultural asturiana y diseñaes pa que l'aprendimientu de les llingües propies se rellacione tamién cola esperiencia cultural, combinando conteníos adaptaos a cada edá cola calidá artística de los espectáculos y actividaes.

La Xira Didáctica va empezar el 19 d'ochobre en Quirós con El trasgu y el molineru, de La Compañía del Alba, y va rematar el 18 de xunu con dos propuestes: Al rodiu l'horru, d'É Vero Teatro, en Cabranes, y Verdina. El día qu’una faba cósmica aterrizó n’Asturies, d'El Arca de Mozart, en Les Regueres.

La participación en toles actividaes ye gratuita, lo que fai posible averar una programación cultural estable n'asturianu y eonaviegu a los escolinos y convertir teatros, cases de cultura y otros espacios en sitios d'alcuentru ente la llingua, la creación y l'aprendimientu.