El X Festival Nel Amaro lleva al Teatru Filarmónica cinco selmanes de teatru profesional n’asturianu
24/09/2026
El X Festival Nel Amaro de Teatru Profesional en llingua asturiana empieza esti vienres, 25 de setiembre, nel Teatru Filarmónica d'Uviéu. Tía Miseria, de Covenant Producciones, ganadora de la edición pasada, va abrir una programación que va enllenar de teatru los cinco vienres vinientes. Tres d'esta primer cita, ochobre va tar acutáu pa les cuatro compañíes que compiten anguaño pol Premiu Nel Amaro. Toles funciones son d'entrada llibre.
Promovíu pola Conseyería de Cultura, Política Llingüística y Deporte, el festival cumple diez ediciones averando al públicu'l trabayu de les compañíes profesionales que creen y representen teatru n'asturianu. Anguaño failo, amás, con una programación especialmente pensada pa conectar coles xeneraciones nueves: cuatro histories mui distintes que recurren al humor, la lliteratura, la naturaleza o la educación p'atrayer al públicu infantil, xuvenil y familiar.
El telón va llevantase esti vienres, a les 20:00 hores, con Tía Miseria. Un montaxe encamentáu a partir de 13 años que bebe de la tradición oral y lleva al escenariu histories y saberes populares al traviés del teatru, los cantares, la danza y l'humor. Escrita por Carlos Alba Cellero y dirixida por Miguel Cubero, la pieza viaxa ente'l pasáu y el presente pa falar de la memoria, la infancia, la vieyera, la muerte y el poder.
Enllaz al programa del X Festival Nel Amaro.
Cuatro vienres, cuatro histories
La competición va empezar el 2 d'ochobre, a les 18:30 hores, con Riquete'l del Copete, d'Higiénico Papel Teatro, compañía que yá se fixo col Nel Amaro nel 2018 y 2020. Esta vez, vuelve con una revisión del cuentu de Charles Perrault que xuega colos sos personaxes y atrévese a plantegar daqué que cualquiera pensó dalguna vez al sentir una historia: ¿y si pudiéramos modificar el final?
El 9 d'ochobre, a la mesma hora, va garrar el relevu Guayominí Producciones con caLORCAlor, un viaxe hasta Fuente Vaqueros y l'universu de Federico García Lorca nel que versos, humor y xuegu escénicu danse la mano. El montaxe foi reconocíu col Premiu Oh! 2023 al meyor espectáculu pa la infancia.
El 16 d'ochobre va llegar Arde la viesca, d'Elektrafiktion. Una quema ruempe la tranquilidá d'una viesca y obliga a los sos animales a abandonar llurigues, niales y abellugos. Van ser los neños quien los ayuden a ponese a salvo, nuna historia qu'avera al públicu más nuevo'l cuidáu de la naturaleza y la prevención de les quemes forestales. La última finalista va xubir al escenariu'l 23 d'ochobre: Dibúxame una pallabra, de Luz de Gas Teatro, cuenta la historia d'Aisha, una neña que nun pue dir a escuela y qu'atopa nel dibuxu una forma de comunicase. Cola ayuda del so amigu Nabid va intentar aprender a lleer y escribir en secreto. El derechu a la educación, la resiliencia y la creatividá traviesen un montaxe que, na so versión en castellanu, recibió los premios ¡Oh! al meyor espectáculu pa la infancia y a la meyor autoría y el Premiu FETEN al meyor espectáculu de compromisu social 2026.
Les cuatro compañíes opten al X Premiu Nel Amaro de Teatru Profesional n'asturianu, dotáu con 6.000 euros y destináu a reconocer la calidá escénica, lliteraria y llingüística de los montaxes. La obra ganadora va siguir, amás, el so percorríu al traviés del circuitu Autores nel Camín del programa Asturies, Cultura en Rede.
Diez años de teatru profesional n'asturianu
El Premiu y Festival Nel Amaro nació nel 2017 con una vocación doble: favorecer la creación profesional nes llingües propies d'Asturies y facer que les obres candidates llegaren al escenariu y al públicu. D'entós p'acá, el certame axuntó propuestes mui distintes, siempre col asturianu y l'eonaviegu como llingües de creación teatral. Puen presentase compañíes profesionales con obres yá estrenaes, tanto orixinales como traducíes dende otres llingües.
El certame recuerda col so nome al escritor y dramaturgu turonés Nel Amaro (1946-2011), una figura fundamental na renovación del teatru asturianu y na so apertura a llinguaxes escénicos contemporáneos. Diez ediciones depués, el festival caltién vivu esi legáu llevando l'asturianu al escenariu y, sobre manera, poniéndolu en contactu col públicu al traviés d'histories, compañíes y xeneraciones nueves.



