La Compañía del Alba lleva'l VIII Premiu Nel Amaro de teatru profesional n'asturianu col espectáculu Perendi. El xuráu d'esti gallardón impulsáu pola Conseyería de Cultura, Política Llingüística y Deporte destacó de Perendi que se trata de “una obra novedosa a nivel dramáticu, qu'innova nos llugares comunes que resulten nun ser tales” con un testu “eficaz, resueltu escelentemente pol equipu d’actores y actrices”.

Perendi, la obra ganadora

Los actores Carlos Alba, Carmen Gloria y Cova Cobos dan vida al testu de Milio Rodríguez Cueto, qu'adapta rellatos publicaos nel diariu La Nueva España ente los años 2000 y 2010. Nesta obra d'humor negru con tintes costumistes ambientada nun conceyu asturianu imaxinariu llamáu Perendi, cuéntase la historia d'una moza que presenta una tesis doctoral na Universidá de Wisconsin sobre un pintor local d'orixe siriu que tenía'l poder d'albidrar nos sos cuadros muertes y desgracies.

Perendi llegó a la final del Nel Amaro xunto a les producciones Amanda y les castañes máxiques (Ambigú Media Broadcast), Gasolina con capullos (Higiénico Papel Teatro) y Formigues (Elektra Fiktion). Estos espectáculos representáronse a lo llargo del mes d'ochobre  nel Teatru Filarmónica d'Uviéu, a lo llargo del festival de teatru que lleva'l mesmu nome que'l premiu.

Nesta edición, amás, el festival incluye la representación de la obra El gorrumbu, de Saltantes Teatro, que resultó ganadora na edición del 2023, esti vienres, 25 d'ochobre, a manera de pieslle.

El Premiu Nel Amaro de teatru profesional n'asturianu

El gallardón, promovíu pola Conseyería de Cultura, Política Llingüística y Deporte, tien por oxetu afianzar, arriquecer y prestixar l'asturianu y l'eonaviegu nel ámbitu del arte dramáticu. Ta dotáu con 6.000 euros.

El premiu y festival lleva'l nome de Nel Amaro, autor a quien se dedicó nel 2021 la 42 Selmana de les Lletres Asturianes y qu'a últimos de la década de los setenta del sieglu pasáu abrió'l camín pa la vanguardia teatral n'asturianu. Ente les sos obres de teatru destaquen Xénesis o alborá de la concencia (1978); Glayíos nueos, vieya murnia (1979); L'únicu rebalbu (1980) y Antígona, por exemplu, que ganó'l Premiu de teatru de l'Academia de la Llingua Asturiana en 1991. Les manes en caxón (2003) foi la so última publicación teatral.