La Conseyería d’Educación publicó’l pasáu 4 de marzu la convocatoria de les pruebes pa sacar los certificaos de competencia llingüística n’asturianu del presente añu 2021. Anguaño vuelve a convocase la prueba del nivel B2, que se ficiera l’añu pasáu pela primer vez, y incorpórase tamién la del nivel C1.

Estes pruebes son una manera d’acreitar la competencia comunicativa en llingua asturiana y tán afayaos a les pautes del Marcu Común Européu de Referencia, un instrumentu que dexa plantear equivalencies ente les distintes enseñances y esámenes d’idiomes. Según esti, el nivel B2 correspuende a un nivel intermediu, en cuantes que’l C1 correspuende a un nivel avanzáu. Cada prueba inclúi exercicios correspondientes a la comprensión y producción de testos orales y escritos, mesmo qu’a la competencia de mediación ente la llingua asturiana y castellana.

Cada prueba almite un máximu de 300 aspirantes. Si hai más solicitúes, les places van axudicase d’alcuerdu con un sistema d’orde alfabéticu que tien como puntu de partida les lletres del primer apellíu a partir de DS (resultáu d’un sortéu públicu). Va haber un primer plazu d’almisión, del 5 al 16 d’abril, nel que s’axudiquen les places del cupu; y un segundu plazu d’inscripción onde se formalice la inscripción y se paguen los precios públicos correspondientes. Namás s’almite la solicitú d’almisión nuna de les pruebes por persona.

Les pruebes de les destreces de comprensión de testos orales, comprensión de testos escritos y producción y coproducción de testos escritos van facese’l sábadu 9 d’ochobre, mientres que les pruebes de producción y coproducción de testos orales van facese a partir del día 18 d’ochobre.

Más información equí