La escritora y filóloga Paula Pulgar Alves ganó’l XIX Premiu María Josefa Canellada de lliteratura infantil y xuvenil n’asturianu, promovíu pola Conseyería de Cultura, Política Llingüística y Deporte, cola obra Secretos, qu’encara valores como la empatía y el respetu al traviés d’una historia centrada nel mundu animal.

El xuráu valoró sobre manera la forma na que Pulgar integra'l léxicu tradicional nun asturianu actual y el so «mui bon manexu del idioma». Tamién destacó un planteamientu y una temática especialmente adaptaos pal públicu más mozo.

El Premiu María Josefa Canellada reconoz la creación lliteraria destinada al públicu infantil y xuvenil en llingua asturiana y ta dotáu con 6.000 euros, un troféu y la publicación de la obra ganadora.

El xuráu d'esta edición tuvo presidíu pol director xeneral d'Acción Cultural y Normalización Llingüística, Antón García, y formáu por Gerardo Fabián Fernández, alcalde de Cabranes; Alonso Zamora Canellada; Xurde Fernández Fernández, ganador de la edición anterior; Alba Carballo López y Alba Sánchez Batalla. Como secretaria actuó Mariló Rodríguez Vázquez, filóloga de la dirección xeneral.

Paula Pulgar Alves ye llicenciada en Filoloxía Hispánica y especialista en Filoloxía Asturiana y desenvolvió bona parte de la so trayectoria profesional ente la enseñanza y la normalización llingüística. Anguaño, exerce como docente nun institutu de Cantabria. La so obra lliteraria incluye títulos como Primeres aventures de Pulgu y Yolín (2007), El mundu de Susana (2008), Cuentos de metru y de centímetru (2008) y Calidoscopiu (2011), amás de relatos publicaos en revistes y volúmenes colectivos. Anguaño publicó tamién, como coautora, Petronila Lupperkrüt y los breves.