Sábese bien que la escritura, que naz de la voluntá de creación y comunicación, lleva con ella un trabayu personal bien importante, una dedicación de tiempu y esfuerzu que, anque nun se puen midir en términos económicos porque’l valir intrínsecu de la lliteratura tresciende estos parámetros, sí que se puen reconocer y incentivar polos poderes públicos.

Por eso, la Conseyería de Cultura, Política Llingüística y Turismu crea y convoca'l Premiu «Enriqueta González Rubín» de Narrativa moza , empobináu a consolidar, arriquecer y prestixar la llingua y la cultura asturianes, na creyencia, amás, de qu’actuaciones como esta contribúin de forma eficaz a dinamizar l’actividá cultural de la Comunidá Autónoma, y sobre manera un aspectu tan importante de la mesma como ye’l de la creación lliteraria ente autores mozos y moces. La incorporación de la mocedá a la xera lliteraria ye un valor qu’asegura la continuidá lliteraria; anque la lliteratura escrita n’asturianu tien una tradición secular, precisa siempre renovación y actualización en forma de valores nuevos. 

El pasáu 4 de payares publicóse nel BOPA (Boletín Oficial del Principáu d'Asturies) l'estractu de la convocatoria de la primer edición del Premiu "Enriqueta González Rubín" de Narrativa moza en llingua asturiana. 

A esti premiu puen presentase obres escrites por persones que tengan menos de 31 años nel momentu nel qu'acaba'l plazu de presentación d'orixinales. Van poder presentase noveles o recopilaciones de cuentos, escrites en llingua asturiana, de tema y estructura llibres que seyan inédites, non premiaes n'otros concursos y tengan una estensión mínima de 50 páxines a doble espaciu con polo menos 100.000 caracteres de la fonte Times New Roman o asemeyada, tamañu 12.

La cuantía del premiu nesta convocatoria ye de 3.000 euros pal autor o autora de la obra que'l xuráu determine como ganadora. 

El plazu de presentación de candidatures remata'l día 19 de payares

Consulta les bases completes del premiu nesti enllaz

Consulta la información completa sobre esta convocatoria y descarga los impresos de solicitú nesti enllaz.