Sidoro Villa gana'l 47 Premiu Xosefa Xovellanos de Novela n'asturianu con ‘Camín de Meri’
28/09/2026
L'escritor y ilustrador Sidoro Villa Costales ganó la 47 edición del Premiu Xosefa Xovellanos de Novela n'asturianu, convocáu pola Conseyería de Cultura, Política Llingüística y Deporte, con Camín de Meri, obra presentada al certame col seudónimu “Pueyes”.
El xuráu valoró especialmente que se trata de “una obra entretenida y equilibrada” que, cola memoria como filo conductor, percuerre dellos momentos de la vida del so protagonista, dende la posguerra hasta anguaño.
El Premiu Xosefa Xovellanos, una de les reconocencies principales a la creación lliteraria n'asturianu, ta dotáu con 6.000 euros, un troféu y la publicación de la obra ganadora.
El xuráu d'esta edición presidiólu Antón García Fernández, director xeneral d'Acción Cultural y Normalización Llingüística, y formáronlu Natalia González Menéndez, Marina Pangua Cuesta (ganadora de la edición anterior), Gonzalo Llamedo Pandiella, María Cueto Fernández y María Ángeles García Rodríguez.
Villa Costales ye maestru de Primaria xubiláu, escritor y ilustrador y cunta con una trayectoria lliteraria n'asturianu que s'estiende a lo llargo de más de dos décades. La so obra incluye la poesía y la narrativa pal públicu infantil, xuvenil y adulto, amás de collaboraciones en revistes, antoloxíes y medios de comunicación. Ente los sos títulos más recién tán A estaya (2016), Tres beyuscos (2019), Pielgos de llercia (2021), El fervinchu (2021), Tres pates pa un tayuelu (2024) y Dípteros (2025). Nel 2020 yá llogró'l Premiu Xosefa Xovellanos con El fervinchu.



