La cantautora Tania Pereira llevó la décimoctava edición del Premiu Camaretá al Meyor Cantar con Piquena, una composición de reíz folk abierta a soníos contemporáneos. El fallu del gallardón convocáu pola Conseyería de Cultura, Política Llingüística y Deporte diose a conocer al términu de la gala celebrada'l vienres 2 d'ochobre nel Teatru de la Llaboral de Xixón, onde los cuatro proyectos finalistes interpretaron los sos cantares en directo primero de la deliberación del xuráu.

La conseyera de Cultura, Política Llingüística y Deporte, Vanessa Gutiérrez, entregó'l gallardón a Tania Pereira, acompañada por Ferla Megía, vencedor de la edición pasada. El premiu ta dotáu con 6.000 euros y un troféu y incluye la producción d'un videoclip y la incorporación de la propuesta ganadora al circuitu Autores nel Camín.

Esther Fonseca y Miguel Ángel Montenegro conducieron una gala na que sonaron cuatro propuestes y estilos variaos de la música fecha güei n'asturianu. Sólo, el proyectu artísticu d'Alfredo González, abrió la competición con Foles; depués xubieron al escenariu Marisa Valle Roso con La Carbonera, Tania Pereira con Piquena y Ochobre con Escuela d'amor.

Tres de les actuaciones finalistes, el xuráu escoyó Piquena, de Tania Pereira, como meyor cantar del 2026. Mientres la deliberación actuó Ferla Megía, ganador de la edición pasada, y la gala concluyó con una nueva interpretación del cantar vencedor al cargu de Tania Pereira.

El xuráu tuvo presidíu pol director xeneral d'Innovación y Cambéu Social, José Antonio Garmón, y formáu por Pablo Alonso, Alicia Álvarez, Emma Posada, Andrea Joglar y Xandru Fernández, profesionales vinculaos a la creación, la interpretación y la divulgación musical. Laura Marcos, filóloga del Serviciu de Planificación y Normalización Llingüística, actuó como secretaria.

Información complementaria