La Conseyería de Cultura, Política Llingüística y Deporte celebró'l 4 d'ochobre'l primer Día Institucional de l'Asturianada, una cita que naz con vocación de continuidá pa reconocer una de les espresiones más singulares de la cultura tradicional asturiana y, sobre manera, contribuyir a que siga pasando d'unes xeneraciones a otres. L'actu fíxose nel Teatru Nuberu de L'Entregu.

Por tiempu aproximao d'una hora, l'escenariu axuntó memoria, música y voces nueves nun actu conducíu por Esther Fonseca. La primer parte viaxó per delles formes de la tradición cantada —molineres, cantares dialogaos, de siega y otros repertorios—, que Fonseca foi introduciendo y que garraron vida al traviés de dellos intérpretes, sobre manera neños y neñes.

Esi protagonismu de les voces infantiles resume bona parte del sentíu de la xornada. L'asturianada, declarada Bien d'Interés Cultural de calter inmaterial nel 2015, llegó hasta los nuestros díes gracies a quien la cantaron, la aprendieron y la tresmitieron. Nes sos lletres y melodíes permanecen formes de vida, trabayos, fiestes, afectos y cambeos sociales que formen parte de la memoria común d'Asturies.

Homenaxe al musicólogu Pieter Minden

Ún de los momentos centrales de la gala foi l'homenaxe al musicólogu alemán Pieter Minden, que morrió apocayá y que tuvo vinculáu estrechamente al estudiu de la canción asturiana. El so trabayu dexó afondar n'aspectos como los modos musicales, los tipos melódicos, los estribillos, la interpretación y la rellación ente la voz y la gaita.

Minden realizó una estancia investigadora n'Uviéu y presentó en 1995 na Universidá de Tübingen una tesis doctoral dedicada a la tonada. Aquel trabayu dio llugar a La tonada asturiana: un acercamiento musicológico, publicáu nel 2001 pol Real Institutu d'Estudios Asturianos y convertíu nuna referencia pal conocimientu del xéneru.

Con esti primer Día Institucional de l'Asturianada, el Gobiernu d'Asturies quier acutar un espaciu propiu y estable nel calendariu cultural pa la canción astuirana. La celebración mira a los que la cantaron, caltuvieron y estudiaron a lo llargo de xeneraciones, pero tamién a los qu'empiecen agora a facela suya.

La gala cuntó cola participación de l'Asociación d'Intérpretes de la Canción Asturiana (AICA) y les asociaciones de canción asturiana del Narcea y del Nalón, amás de la collaboración del Conceyu de Samartín del Rei Aurelio.

llinguastur.general.info-complementaria