El cineasta y escritor Ramón Lluís Bande ganó la 32 edición del Premiu Máximo Fuertes Acevedo d’Ensayu, convocáu pola Conseyería de Cultura, Política Llingüística y Deporte, con La mirada ordenada, una obra que s'avera al cine realizáu n'Asturies al traviés de l'análisis de nueve películes.

El xuráu concedió'l gallardón por unanimidá y valoró'l trabayu como «valiente, creativu, orixinal y mui necesariu». La obra propón una reflexón contemporánea sobre'l séptimu arte y la so capacidá pa recuperar la memoria y la identidá d'Asturies, combinando la mirada personal del cinéfilu cola conocencia y la esperiencia del cineasta profesional. Bande presentó La mirada ordenada col seudónimu «El cineasta». Tres de l'apertura de la plica, confirmóse l'autoría del creador xixonés.

Ramón Lluís Bande (Xixón, 1972) ye escritor y cineasta y desenvolvió la so trayectoria ente la lliteratura, l'audiovisual y la televisión. La so obra cinematográfica punxo atención especial na memoria, la identidá y la historia d'Asturies y ta consideráu ún de los nomes vinculaos al denomináu Nuevu Cine Asturianu.

El xuráu d'esta edición presidiólu Antón García, director xeneral d'Acción Cultural y Normalización Llingüística, y formáronlu Darío de Dios Sanz, Claudia Elena Menéndez, María Fernández Abril, Jorge Arturo Sierra Álvarez y Iris Díaz Trancho, ganadora de la edición anterior.

El Premiu Máximo Fuertes Acevedo reconoz y visibiliza dende va más de trés décades la meyor producción ensayística asturiana y afianzóse como un referente de la creación ensayística n'Asturies.