El Gobiernu del Principáu llogró un alcuerdu col Ministeriu d'Educación pa la reconocencia de la especialidá docente de llingua asturiana y eonaviegu. Dambes alministraciones ufierten asina respuesta a una demanda histórica, pola que n'Asturies se vien trabayando dende va años, ensin que hasta agora fuere posible algamar una solución satisfactoria.

El presidente del Executivu autonómicu, Adrián Barbón, y la ministra d'Educación, Formación Profesional y Deportes, Milagros Tolón, informaron sobre esta decisión tres del alcuentru que celebraron en Madrid el día 9 de xunetu, nel que tamién participaron la conseyera d'Educación, Eva Ledo, y el secretariu d'Estáu del ramu, Abelardo de la Rosa.

El Gobiernu d'España anunció que va modificar la normativa estatal cola mira de que les llingües autóctones d'Asturies puedan cuntar con una especialidá docente.

La última solicitú planteada pol Principáu al ministeriu, a la qu'agora se da respuesta, sofítase en dos premises fundamentales: per un llau, la protección y promoción de les llingües autóctones, recoyida tanto na llei d'usu de 1998 como na Carta Europea de les Llingües Rexonales o Minoritaries; d'otra manera, na situación d'interinidá enllargada del profesoráu que les imparte, un fechu que contravién los criterios del Estatutu Básicu del Emplegáu Públicu.

La Llei 1/1998, de 23 de marzu, d'Usu y Promoción del Bable/Asturianu, establez nel so artículu 9 que'l Principáu, nel exerciciu de les sos competencies, va asegurar la enseñanza de les llingües autóctones y va promover el so usu dientro del sistema educativu. Pela so parte, la Carta Europea de les Llingües Rexonales Minoritaries, que reconoz la llingua asturiana como tal, marca una serie de compromisos pa impartir estes materies nes distintes etapes educatives.
Asturies cumple tanto la llei d'usu como los compromisos de la carta, yá que diseñó una ufierta amplia nel sistema escolar dende los 3 años d'edá. Sicasí, el personal docente escarez de medios de promoción y, hasta agora, nun podía acceder a les condiciones d'estabilidá que disfruta'l restu del profesoráu.

L'alcuerdu alcanzáu ente les dos alministraciones va ayudar a meyorar sustancialmente les condiciones llaborales y la estabilidá d'esti colectivu. Amás, da respuesta a ún de los compromisos recoyíos nel Pactu Asturies Educa, soscritu va un añu y concebíu como fueya de ruta pa fortalecer la escuela pública.

Nel cursu escolar qu'acaba de rematar, el sistema educativu asturianu cuntó con un total de 318 docentes de les dos llingües autóctones: 295 d'asturianu (211 d'Infantil/Primaria y 84 de Secundaria) y 23 d'eonaviegu (17 d'Infantil/Primaria y 6 de Secundaria).

La matriculación n'asturianu y eonaviegu aumentó esti cursu un 34,2 %, con un total de 30.782 estudiantes. Esta crecedera, que se rexistra per cuartu añu siguíu, respuende en parte a la introducción d'esta ufierta nel segundu ciclu d'Infantil (3-6 años) como elección voluntaria.