La Conseyería de Cultura, Política Llingüística y Deporte impulsa'l XVII Premiu Camaretá al Meyor Cantar, que va celebrar la gala final el vienres 7 de payares, a les 19:00 hores, nel Teatru Vital Aza de La Pola (L.lena).

El certame, dotáu con 6.000 euros, va reconocer un añu más la creación musical n'asturianu y eonaviegu, y nesta edición cuenta con Héctor Braga, Ferla Megía, Herbamora y Lïbre como finalistes. Na gala, retresmitida per RTPA y con entrada llibre hasta enllenar l'aforu, va dase a conocer el fallu del xuráu, y el públicu va poder disfrutar amás del conciertu de La Bonturné, el grupu ganador de la edición pasada col tema Odisea la nuí.

El xuráu del XVII Premiu Camaretá encargáu de seleccionar les candidatures finalistes ta integráu pola cantante Alicia Álvarez, el periodista Xicu Ariza, la técnica de normalización llingüística Penélope Miranda, la filóloga y gaitera Andrea Joglar y la profesora Emma Posada.

Cultura convoca esti gallardón col oxetivu de consolidar, prestixar y arriquecer la creación musical n'asturianu y eonaviegu. Amás, la propuesta ganadora va formar parte del circuitu Autores nel Camín, que promueve actuaciones en distintos conceyos dientro del programa Asturies, Cultura en Rede.

Los cuatro temes finalistes d'esta edición son:

• Héctor Braga, con Valiente. Referente consolidáu de la música asturiana, con siete discos publicaos y bien de reconocimientos poles sos creaciones musicales y ensayístiques.
• Ferla Megía, con Xatu. Creador d'atmósferes y una de les voces más inquietes de la escena actual, fusiona soníos urbanos y tradicionales. El cantar forma parte del so EP Páxaros 01.
• Herbamora, con Eclipse total. Grupu de cinco pandereteres y cantantes qu'actualicen la tradición de la pandereta. Ganadores del premiu en 2007, presenten el so tema dientro del álbum 286 Llunes.
• Lïbre, con L'ablugada. Formación reciente con miembros de Mala Reputación, Misiva, Origen y Desakato. Nel so EP Ciudadano Lunar esploren del pop alternativu al rock d’autor.

Nel enllaz https://www.asturiesculturaenrede.es/premiucamaretaalmeyorcantar/ pueden conocese tolos detalles y sentir los cantares finalistes.