La compañía Covenant Producciones ganó'l IX Premiu Nel Amaro de Teatru Profesional n’asturianu col espectáculu Tía Miseria. El xuráu d'esti gallardón impulsáu pola Conseyería de Cultura, Política Llingüística y Deporte destacó nel acta de la so reunión «la calidá llingüística y el nivel interpretativu d'un espectáculu que, con ritmu áxil y naturalidá grande, trai a l'actualidá’' corpus cultural de la tradición asturiana, apurriendo una mirada crítica a la sociedá actual».

Tía Miseria llegó a la final del Nel Amaro xunto a les producciones 1001 Una odisea nel desiertu (Higiénico Papel Teatro), Vuelu d’andarines (Nun Tris Teatro) y Al rodiu l’horru (É Vero Teatro). Estos espectáculos representáronse a lo llargo del mes d’ochobre nel Teatru Filarmónica d’Uviéu, nel festival de teatru que lleva’l mesmu nome que’l premiu entamáu por Cultura.

La compañía y la obra ganadora

Covenant Producciones creóse cola mira d'entamar y producir espectáculos sobre tradición oral, identidá cultural, memoria y tradición. Una de les sos producciones más conocíes ye Animalada xabaz, serie infantil de TPA qu'axunta marionetes, cuentos tradicionales, teatru y música rock.

Nel añu 2003 empezaron a desenvolver ¡Rodando! Esnidien les histories, un proyectu multiplataforma sobre la cultura nel mediu rural asturianu, cola obra Tia Miseria como exa central. Asina, esta producción qu'agora lleva'l Premiu Nel Amaro vien de la tradición oral: una serie d'escenificaciones d'histories nacíes d'esta fonte de sabiduría popular. El monologuista Carlos Alba Cellero adapta y reformula esti cuentu d'oríxenes milenarios con música, cantares, danza, cosadielles, sabiduría popular, instrumentos tradicionales y humor.

El Premiu Nel Amaro de Teatru profesional n'asturianu

El gallardón, promovíu pola Conseyería de Cultura, Política Llingüística y Deporte, tien por oxetu afianzar, arriquecer y prestixar l'asturianu y l'eonaviegu nel ámbitu del arte dramáticu. Ta dotáu con 6.000 euros. 

El premiu y festival lleva'l nome de Nel Amaro, autor a quien se dedicó nel 2021 la 42 Selmana de les Lletres Asturianes y qu'a últimos de la década de los setenta del sieglu pasáu abrió'l camín pa la vanguardia teatral n'asturianu. Ente les sos obres de teatru destaquen Xénesis o alborá de la concencia (1978); Glayíos nueos, vieya murnia (1979); L'únicu rebalbu (1980) y Antígona, por exemplu, que ganó'l Premiu de teatru de l'Academia de la Llingua Asturiana en 1991. Les manes en caxón (2003) foi la so última publicación teatral.