El V Festival Nel Amaro de Teatru Profesional en Llingua Asturiana y Gallego-Asturianu arranca esti vienres cola representación de la obra infantil Grana de cardamomu, de la compañía El Callejón del Gato.

A esta representación van siguila otres tres, onde les compañíes Nun Tris, Factoría Norte y Arte Producciones van tener ocasión, nos siguientes vienres del mes d'ochobre, de representar les sos obres La reina de la guapura de Leenane, Les piripiripirates con parches y a lo xole y Setiembre, por esi orde. 

En rematando'l Festival, el xuráu va aconceyar pa decidir cuála d'estes obres, preseleccionaes pol mesmu xuráu, va llevar el V Premiu Nel Amaro de Teatru Profesional en Llingua Asturiana y Gallego-Asturianu. Esti xuráu ta formáu pola actriz María Cotiello, les filólogues y docentes Pilar Fernández y Mar Friera, l'escritor Chechu García y l'actriz y crítica teatral Eva Vallines. 

Les representaciones van facese nel Teatru Filarmónica d'Uviéu los vienres 1, 8, 15 y 22 d'ochobre, toes elles a les 8 de la tarde y con entrada llibre hasta completar aforu, según les restricciones sanitaries vixentes. 

Sinopsis de Grana de cardamomu d'El Callejón del Gato

Estrella y la  ma acaben de dir a vivir al pueblu, a la vieya casa familiar. Güei ye'l so cumpleaños, y la neña recibe una carta bien especial: si quier atopar los sos regalos, va tener que solucionar una cosadiella.

Empieza entós una gran aventura de la mano de personaxes célebres y misteriosos; va tener que solucionar dellos enigmes y cosadielles, y a la fin va poder tornar pa casa. ¡Ah!, y pel camín va consiguir un puñáu de grana de cardamomu.

Ana Eva Guerra y Moisés Gutiérrez son los autores d'esta obra, traducida al asturianu pol escritor Vicente García Oliva, que tamién dirixen y protagonicen xunto a l'actriz Paula Mata. 

Información complementaria