La Conseyería de Cultura, Política Llingüística y Deporte concedió 98.661,14 euros a doce proyectos de medios de comunicación destinaos a favorecer la normalización social del asturianu y, nel so ámbitu, del eonaviegu.

La resolución de la convocatoria, publicada nel Boletín Oficial del Principáu d'Asturies (BOPA) del 18/08/2026, beneficia a ocho empreses y sofita iniciatives desenvueltes en prensa escrita y dixital, asina como otros formatos d'información y divulgación.

La mayor ayuda correspuende a Mecigaya Creativa, S. L., que recibe 30.000 euros pal proyectu Musicasturiana.com. Personas Comunicación y Publicidad, S. L. llogra 10.506,68 euros pa la integración de la llingua asturiana nos diarios dixitales miGijón y miOviedo, ente que Ediciones Periódiques del Noroeste, S. L. recibe 10.184,75 euros pal Proyectu Agora: Canal d’actualidá n’asturianu de La Voz d’Asturies.

El Comercio, S.A.. va cuntar con 10.720,11 euros repartíos ente Alitar Asturies Web, con 9.386,78 euros, y el pódcast N’Ayuri, con 1.333,33 euros.

Pela so parte, Editorial Prensa Asturiana, S.A.O recibe un total de 12.655,14 euros pa trés iniciatives: Artículos n'asturianu, con 1.215,49 euros; Escolinos, con 7.096,95 euros, y Web n’asturianu, con 4.342,70 euros.

La convocatoria tamién concede 16.865,79 euros a Cuatro Gotes Producciones, S. L., destinaos a los proyectos Xixón al día, con 8.528,87 euros, y Revista Viaxast, con 8.336,92 euros. Igualmente, Ventura y El Faro, S. L. recibe 4.506 euros pa la publicación de páxines n'asturianu n'El Faro de Carreño y Gozón, y Espublizastur, S. L., 3.222,67 euros pa Infoasturies.com.

Estes ayudes convocáronse en xineru con una dotación inicial de 110.000 euros y tán dirixíes a empreses de prensa, radio, televisión y medios dixitales d'ámbitu asturianu que desenvuelvan conteníos n'asturianu o eonaviegu dientro de les sos propies canales de comunicación.

La convocatoria forma parte de les polítiques del Gobiernu d'Asturies dirixíes a incrementar la presencia habitual de les llingües propies nos medios de comunicación, ampliar los espacios d'información y divulgación disponibles n'asturianu y eonaviegu y favorecer la so incorporación a nuevos formatos, conteníos y públicos.