La decimoctava edición del Premiu «Alfonso Iglesias» n'asturianu, promovíu pola Conseyería de Cultura, Política Llingüística y Deporte, reconoció'l trabayu d'Arantza Margolles Beran (Xixón, 1982), autora del cómic Slečno, basáu nel diariu de viaxe d'una muyer asturiana con raíces en Moravia que viaxa a Olomouc p'aprender la llingua checa y poder asina averase al pasáu de la so familia.

El xuráu d'esta edición tuvo integráu pol filólogu Marcos Martínez, la ilustradora Mónica García y l'escritor Agustín Cernuda del Río, ganador de la última convocatoria del premiu. Ente los valores de la obra premiada, los miembros del xuráu destacaron nel acta «la orixinalidá y la coherencia de la propuesta gráfica, y la espresividá cola que se da forma a una historia personal entemecida cola memoria histórica familiar y social». Margolles construye asina un relatu de fuerte carga personal y emocional qu'enxareya lo íntimo y lo colectivo pa encarar, dende'l llinguaxe del cómic, una historia vinculada a la memoria histórica familiar y social.

El Premiu «Alfonso Iglesias», convocáu pola Conseyería de Cultura, Política Llingüística y Deporte, ta dotáu con 6.000 euros y la publicación de la obra ganadora. Podíen presentase obres inédites y non premiaes n'otros concursos, d'estilu, tratamientu y tema llibre, pudiendo garrar el desenvolvimientu d'una historia única o un conxuntu d'histories, con una estensión mínima de cincuenta páxines.

Arantza Margolles (1982)

Arantza Margolles Beran ye llicenciada n'Historia pola Universidá d'Uviéu y posgraduada pola Universidá Autónoma de Madrid. Collaboradora en dellos medios de comunicación asturianos y responsable de la sección d'efemérides del diariu El Comercio, presentó'l programa Historias y Misterios en RTPA y ye codirectora del diariu A Quemarropa, de la Selmana Negra de Xixón. En llingua asturiana tien publicaes les obres Fuimos granos d'arena. La solidaridá n'Asturies énte'l desatre d'Annual (2024) y la novela histórica Santo Amaro, cola que ganó'l Premiu Muyer d'Ediciones Trabe'l pasáu añu 2025.