La Viceconseyería de Cultura, Política Llingüística y Deporte impulsa la II edición del Reguerada Fest, un puntu d'alcuentru y promoción de la cultura y el mundu empresarial qu'usa la llingua asturiana como seña d'identidá. D'esta miente, una ventena d'entidaes y creadores van citase en Candás ente'l 13 y el 15 d'ochobre pa mostrar el so trabayu. Amás, va haber cerca de 30 actividaes de baldre.

El director xeneral d'Acción Cultural y Normalización Llingüística, Antón García, presentó güei la programación d'esta iniciativa. Les actividaes, dirixíes a tolos públicos, incluyen una feria, recitales literarios, talleres, charles, esposiciones y conciertos, que van desenvolvese na Fábrica d'Ortiz, el Teatru Prendes, el Muséu Antón y la Biblioteca de Candás.

El festival nació l'añu pasáu cola vocación d'averar a la sociedá les actividaes que desenvuelven creadores, entamadores y organizaciones sociales alrodiu de la llingua asturiana. El Reguerada Fest fai homenaxe col so nome a Antón de Marirreguera, nacíu nel conceyu de Carreño y autor de la que se considera la primer obra lliteraria n'asturianu que se caltién.

La inauguración de la esposición Fila/pallabra, una muestra artística de la uvieína Dido Carrero, va dar empiezu al Reguerada Fest el vienres 13 nel Muséu Antón. Pela so parte, la Fábrica d'Ortiz va acoyer a lo llargo del festival un mercáu y una feria de llibros y empreses con venti entidaes participantes.

La llista d'actividaes incluye recitales poéticos, alcuentros con autores y meses redondes, amás de proyecciones de películes asturianes, actuaciones de Teatru Carbayín y cuntacuentos con Carlos Alba. Amás, va haber talleres d'escritura, d'estampación testil y de construcción de títeres pa tolos públicos. Tamién ta prevista una ruta cultural y lliteraria per Candás.

La parte musical del Reguerada Fest va tar al cargu de la Banda de Gaites de Candás, Algaire, Alicia Álvarez y el so Kíkiriki pal públicu infantil y Nacho Vegas, que va tocar los sos Cantares dende´l pie. Va haber, amás, un pasucáis al cargu del Grupu de Baille San Félix.

Toles actividades van ser de baldre. Equí puedes descargar el programa d'actos del II Reguerada Fest.

Información complementaria