El vienres 29 de setiembre va facese la primer representación del VII Festival Nel Amaro de Teatru Profesional en llingua asturiana. Nesti festival van representase les trés obres finalistes qu'opten al premiu del mesmu nome, escoyíes pol xuráu nuna primer fase celebrada nel mes de mayu. 

El Premiu «Nel Amaro» ta convocáu pola Viceconseyería de Cultura, Política Llingüística y Deporte nel contestu de los premios lliterarios y artísticos en llingua asturiana o eonaviegu, y pueden presentase a él empreses del sector profesional dedicaes a la producción y representación d'espectáculos teatrales. 

El xuráu, integráu por especialistes en teatru y llingua asturiana, escoyó na so primer xunta estos trabayos pa representase nel VII Festival Nel Amaro nes feches equí indicaes:

• Xuan Soldáu, de Carlos Alba (6 d'ochobre).
• El gorrumbu, de Saltantes Teatro (13 d'ochobre). 
• Caperucita en Muniellos, d'Escenapache (20 d'ochobre).

Amás, anguaño'l públicu va tener ocasión de volver disfrutar de les obres ganadores del añu 2021 y 2022, La reina de la guapura de Leenane, de Nun Tris Producciones, y Les madreñes vacíes, de Carlos Alba, que van abrir y zarrar, respectivamente, el festival los díes 29 de setiembre y 27 d'ochobre. 

El Teatru Filarmónica d'Uviéu va acoyer les representaciones, con entrada llibre y de baldre hasta completar aforu. Les representaciones, aptes pa tolos públicos y empobinaes a un públicu familiar, van empezar a les 18:00 hores, sacante la de La reina de la guapura de Leenane, que se va facer a les 20:00 hores por ser una obra pa públicu adulto. 

El festival dispón d'una web, www.festivalnelamaro.com, onde se pueden consultar tolos detalles de les funciones y de les obres, como la sinopsis, la ficha técnica o la trayectoria de la compañía. Amás, la web recueye tamién información sobre los ganadores d'otros años, incluyendo enllaces a versiones audiovisuales de les obres Hansel y Gretel (Premiu Nel Amaro 2018) y El viaxe de Covaletti (Premiu Nel Amaro 2020), que tán disponibles pa ver per internet. Amás, tamién se pueden atopar recursos didácticos sobre estes obres pa usar en contestos educativos. 

El Premiu Nel Amaro de Teatru Profesional, dotáu con 6.000 euros, convócase cola mira d'afianzar, arriquecer y prestixar les llingües d'Asturies nel ámbitu del arte dramáticu. Amás, el Principáu promueve la representación de la obra a lo llargo del territoriu asturianu al traviés del programa Autores nel Camín.

El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n'asturianu. Nel Amaro foi amás l'autor al que se dedicó la edición de la Selmana de les Lletres Asturianes nel 2021.