El Serviciu de Cartografía del Principáu d'Asturies, perteneciente a la Conseyería de Mediu Rural y Cohesión Territorial, trabaya na ellaboración de los mapes de la toponimia oficial d'Asturies. Esti proyectu ye posible gracies al trabayu documental previu lleváu a cabu pola Conseyería de Cultura, Política Llingüística y Turismu a través de la Xunta Asesora de Toponimia, de conformidá colos criterios de l'Academia de la Llingua Asturiana, y a la collaboración de los propios  conceyos.

La intención de la Dirección Xeneral d'Ordenación Territorial y Urbanismu, de la que depende Cartografía, ye esparder esti llabor al territoriu de la comunidá. A la fecha, estos trabayos de xeorreferenciación completáronse en 49 conceyos (de los que 10 tienen yá mapa), 12 tán en preparación y 5 van empezar nel 2021. Hay 12 conceyos de los qu'entá nun  s'aprobó la toponimia oficial.

Los profesionales autonómicos en materia de cartografía realizaron, en collaboración colos consistorios, munches vegaes a través de los sos Servicios de Normalización Llingüística, un trabayu de xeorreferenciación de los topónimos oficiales incluyíos nos Decretos d'Oficialización pa treslladalos a la cartografía que se xenere sobre caún de los conceyos.

Los mapes recueyen con gran nivel de detalle los asentamientos de población (parroquies, capital del conceyu, aldees, barrios, quintanes tradicionales y cases esperdigaes). Depués van tar disponibles nel xeoportal del Principáu d'Asturies, SITPA-IDEAS (ideas.asturias.es), dende onde van poder descargase llibremente.