L'escritor Milio Ureta (Ribeseya, 1970) foi declaráu ganador de la III Beca Asturies de Lliteratura en residencia, proyectu qu'impulsa la creación n'asturianu y gallego-asturianu o eonaviegu, y que cunta col sofitu de la Viceconseyería de Cultura, Política Llingüística y Deporte del Principáu d'Asturies. 

Nesta tercer edición, la más concurrida hasta la fecha, el xuráu, formáu pol editor Rafael R. Valdés, la escritora Berta Piñán y l'autor ganador de la edición pasada, Pablo X. Suárez, destacó'l númberu y la diversidá de les propuestes presentaes, amás de les distintes miraes tocante a xéneros y temátiques. D'ente elles, escoyó por unanimidá'l proyectu presentáu por Milio Ureta, por ser «la propuesta lliteraria más ambiciosa; un proyectu sólidu qu'entemez estilos que xueguen y raspien lo narrativo, lo poético y lo dramático, y que cunta con un trabayu previu de documentación». Amás, sorraya que ye una propuesta d'autoficción que se presenta «nel momentu d'ellaboración oportunu». 

Con esti proyectu l'autor aventúrase nuna propuesta híbrida que va acullá del xéneru poéticu, pol que ye más conocíu y onde destacó con títulos como Poemes del amor simétricu (2019) o Pexe les manes (2022), poemariu ganador del Premiu «Teodoro Cuesta» de Poesía. 

Graduáu n'Humanidaes y con formación n'interpretación actoral, dramaturxa y escritura creativa, Ureta tamién ye autor de rellatos curtios y traducciones lliteraries, actividaes que compaxina col trabayu nel sector turísticu. 

Nes cuatro selmanes que va pasar na Residencia Literaria 1863, un apartamentu del sieglu XIX en metá del cascu históricu de la ciudá d'A Coruña, Ureta va concentrase nun proyectu narrativu bien ambiciosu, chiscáu d'elementos dramáticos y poéticos que combina memoria, identidá y conciencia de clas al traviés d'un personaxe femenín. 

Amás, l'autor va metese dafechu na vida cultural gallega y va tener ocasión de vese con otres persones del mundu intelectual gallegu, ente les que s'alcuentra la mesma directora de la residencia creativa, la Premiu Nacional de Poesía d'anguaño, Yolanda Castaño. 

Información complementaria