Ta en marcha'l II Ciclu de poesía QED, un conxuntu de recitales poéticos que se va celebrar n’Uviéu a lo llargo de la seronda de 2023. Esta serie d’eventos va axuntar los versos de poetes asturianos y asturianes colos de xente bien relevante de la lliteratura d’otres zones, como Galicia, País Vascu y Madrid. Estos alcuentros poéticos, que fai l'Asociación Cultural Mezá y que tán coordinaos pol poeta Miguel Rodríguez Monteavaro, van desenvolvese nel Salón d’Actos de la Biblioteca d’Asturies “Ramón Pérez de Ayala” d’Uviéu y cunten col patrociniu económicu de la Viceconseyería de Cultura, Política Llingüística y Deporte del Principáu d’Asturies, baxo la etiqueta Asturies Cultura en Rede. 

L’oxetivu principal del ciclu QED ye promocionar y dar voz a los poetes en llingua asturiana y eonaviegu fuera d’Asturies y trayer dellos referentes qu’escriben n’otres llingües como exemplu de lo que se ta faciendo actualmente n’otres árees d’Europa. Amás el QED nació col enclín de ser un puntu d’alcuentru pa les diferentes xeneraciones y estilos de poetes asturianos, buscando siempre la calidá y la visión de futuru lliterariu. 

El primeru de los recitales del QED va ser el viernes 27 d’ochobre a les 19,00 h. y va xuntar a la cantautora Lorena Álvarez col premiáu poeta asturianu Alejandro Fernández Osorio y el cantaor flamencu Niño de Elche. Nel mes de payares, el viernes 24, va ser el turnu de la nueva poeta asturiana Patricia Álvarez, el poeta y matrón Sergio G. Camblor y una de les máximes esponentes de la poesía gallega contemporánea, Chus Pato. Nel mes d’avientu, el viernes 22, va poder escuchase al Premiu Asturies Xoven de Poesía 2021 Aníbal González, a la poeta y editora Esther Prieto y al Premiu Nacional de Narrativa Kirmen Uribe. La primer edición del QED celebróse na seronda de 2022 xuntando a los escritores y investigadores Xaime Martínez, Xosé Ambás y Aurélia Lassaque; les poetes María García Díaz, Marta Mori y Olga Novo, al músicu Nacho Vegas y a los poetes Xuan Bello y Bernardo Atxaga.

Información complementaria